земјоделски површини – Kurir.mk

Оштетени земјоделски површини од вчерашното невреме во прилепско

Ивона Петрова — Wed, 30 Aug 2023 10:49:37 +0000

Голема штета на земјоделските површини и култури нанесе вчерашното невреме во Прилеп и околината. Како што известуваат од ЦУК, најмногу врнежи од град со големина на лешник имало во месноста „Заград“, с. Мажучиште како и во с. Мало Коњари. Пријавените штети на насадите со тутун и пипер дополнително ќе се утврдуваат од комисијата за процена на штети во Министерството за земјоделие - Подрачното одделение во Прилеп, заедно со комисијата за утврдување на штети во општината.

Наместо поттик на стопанство, Заев се фрли на распродажба на земјата или на земјоделските површини

Тале Кристо — Tue, 09 Feb 2021 13:39:19 +0000

Премиерот Зоран Заев и Владата наместо да го искористат целокупниот природен потенцијал и богатства на Македонија за промоција и напредок одлучија да го стават на продажба еден од најдобрите природни ресусрси и потенцијали со кои располага Македонија, а тоа е државното земјоделско земјиште. Заев ќе продава државно земјоделско земјиште во време кога претстои светска прехрамбена криза за да полни буџет. „Мора да се продава државен имот, бидејќи нема простор за задолжување“ е став на минситерот за финансии Фатмир Бесими. Заев и владата кои ја презадолжија државата сега ќе го распродаваат еден од најважните државни ресурси, земјоделското земјиште со цел да обезбедат 200 до 300 милиони евра од продажба на 20% од вкупните површини. Владата, преку Заев и Бесими најави продажба на државно земјоделско земјиште во наредните 3 години – 2021, 2022 и 2023. Ова распродавање на земјиштето е планирано да почне од втората половина на 2021 година. Владата планира продажба на 20 – 30% од вкупното државно земјоделско земјиште, кое според нивни проценки вреди повеќе од 2 милијарди евра. Замјоделското земјиште е природен државен ресур кој во време на светска криза за храна во никој случај не би требало и не смее да се отуѓува. На овај начин се уништуваат дополнително и помалите земјоделици кои што не можат да си дозволат да купат големи површини бидејќи Заев и владата решиле најмала површина која ќе може да се купи да биде 10 хектари. Земјоделското земјиште во сопственост на државата, ќе можат да го купат физички и правни домашни лица, но и правни лица со странски капитал. Купувачот има обврска да го работи земјиштето, односно да отвори нови работни места. Земјиштето не смее да се преименува во градежно земјиште. Најголеми парцели ќе се продаваат низ Пелагонија и Овче Поле. Најмала површина која ќе може да се купи ќе биде 10 хектари.

Обилните врнежи предизвикаа поплавување на земјоделски површини и куќи, следува постуден период

Ивона Петрова — Wed, 13 Jan 2021 06:45:51 +0000

Обилните врнежи од дожд предизвикаа зголемување на водостојот на реките, а наместа тие се излеаја од своите корита. Поради одрони, во прекин беше и сообраќајот на одредени патни правци. Синоптичарите за денеска попладне и за утре најавуваат нови врнежи, проследени со ветер и пад на температурите. Поради продор на студена воздушна маса од север, се очекуваат локални врнежи кои речиси насекаде ќе бидат од снег и повеќе ќе бидат позастапени во западните делови каде тенка снежна покривка ќе има и на пониските места. Врнежите ќе завршат ноќта кон петок, кога ќе следува период со значително ниски температури. В петок и за време на викендот ќе биде суво и многу студено, а температурата во поголем дел од земјава преку целиот ден ќе се задржи под нулата. Најстудено ќе биде наутро за време на викендот кога температурата во Малешевијата и во Пелагонија ќе се спушти и до -12 Целзиусови степени. Управата за хидрометеоролошки работи (УХМР) вчера информираше дека се очекува сите водотеци да бидат натпросечни за овој период од годината, но со појавата на минусните температури од четврток, нивоата брзо да опаѓаат. Поради можните излевања на некои реки и дел на нивните притоки, препораката е граѓаните внимателно да се движат покрај водотеците, суводолниците и клисурите. Излевањето на дел од реките беше причина за поплавување на обработливо земјоделско земјиште, а во некои села беа поплавени куќи и помошни простории. Во општина Јегуновце беа поплавени три куќи во селото Раотинце, како и земјоделско земјиште во Туденце, Сиричино, Јегуновце и Раотинце. Во Велес, каде исто така тече Вардар, засега ситуацијата е под контрола. Има мали излевања кај дел од шеталиштето на Кејот и во близина на кафеаната кај „Ингилизот“ во Градскиот парк и на мал дел од бавчите во Речани, но без поголеми штети. Кризниот штаб, како што изјави градоначалникот Аце Коцевски, ја следи ситуацијата и е во постојан контакт со УХРМ и другите надлежни институции со цел да се реагира навреме и да не се дозволи излевање. Во кумановско и Старо Нагоричане вчера нивоата на Пчиња и Крива Река се уште беа на високо ниво. По течението на Пчиња поплавено е земјоделско земјиште, седум-осум викенд куќички, три-четири индивидуални куќи за живеење и претежно помошни објекти како штали. Во Старо Нагоричане, Пчиња е излеана кај Меморијалниот Центар АСНОМ до мостот Коинце во должина од седум километри. Обилните врнежи беа причина и за прекин на сообраќајот на одредени патни правци и пренасочување на возилата по алтернативни патишта. Според информацијата на „Македонија пат“, сообраќајот на патот Кочани-Македонска Каменица, на делницата од Истибања до браната Калиманци, кај м.в. Ајдучки Камен, се уште целосно во прекин. Лесните патнички возила се пренасочуваат преку регионалниот патен правец Кочани – Виница – Бигла – Делчево, а тешките товарни возила и автобусите преку регионалниот патен правец Кочани – Виница – Берово – Делчево. Од Републичкиот совет за безбедност на сообраќајот на патиштата апелираа возачите да бидат внимателни и да ја прилагодуваат брзината кон зимските услови на патот поради појава на голомразица и влажни и лизгави коловози особено во раните утрински или доцните вечерни часови. Оттаму потсетуваат и на задолжителната обврска за зимска опрема на возилата. – Оние возачи кои се уште не обезбедиле зимска опрема (синџири за снег или зимски гуми), потребно е веднаш да го сторат тоа, бидејки покрај санкциите предвидени со ЗБСП и можноста полицискиот службеник да ги отстрани од сообраќај, со не обезбедувањето на зимската опрема ја загрозуваат сопствената безбедност, но и безбедноста на сите други учесници во сообраќајот, посочија од РСБСП. Поради најавените нови врнежи и ниски температури, вчера со препорака излезе и Агенцијата за храна и ветеринарство. На својата интернет страна, АХВ објави препораки во кои меѓу другото се апелира до фармерите навреме да обезбедат доволни количини храна и вода за животните и соодветно засолниште. Доколку не постои можност веднаш да се засолнат животните, привремено да се користа ќебиња или друг вид прекривки за нив но, притоа прекривките секогаш да бидат суви. – Здравствената состојба на животните во вакви услови треба почесто од вообичаено да се следи, односно животните треба почесто да се посетуваат и набљудуваат. Молзните животни треба да се измолзуваат редовно, во вообичаените интервали. Кругот во одгледувалиштето и пристапните патишта треба редовно да се чистат од снег или мраз. Одгледувачите на животни треба да се во комуникација со нивниот ветеринар, за дополнителен совет или доколку се потребни интервенции, се вели во препораките на АХВ. МИА