Мајкл Ман го навести филмот „Жештина 2“

Ивона Петрова — Thu, 21 Jul 2022 06:48:58 +0000

Режисерот Мајкл Ман на крајот на осмото десетлетие од животот реши да ѝ се врати на приказната од еден од најдобрите филмови во својата кариера… Имено, тој се враќа на режисерското столче по седумгодишна филмска пауза – за филмот „Ферари“ (Ferrari) којшто наскоро ќе почне да се снима, но тука е и неговиот роман „Жештина 2“ (Heat 2), којшто ќе се појави во книжарниците во август, а кој, според Ман, ќе стане и филм. Се работи за претпродолжение на култниот филм „Жештина“ од 1995 година. Во новото интервју со Марк Марон, Ман ги потврди наводите. – Ова е книга, но наскоро ќе биде навистина голем филм. Отсекогаш сум сакал да го истражам раниот живот на овие момци, но и како да го внесам минатото во сегашноста. Секако, ќе треба да се најдат соодветни глумци кои ќе ги прифатат улогите кои ги толкуваат Ал Пачино, Роберт де Ниро и Вал Килмер во првиот дел. Но, Ман тврди дека има големи планови како да го направи тоа. Сепак, засега на дневниот ред на Ман се новата сезона на „Пороците на Токио“ (Tokyo Vice) и – филмот за животот на Енцо Ферари со Адам Драјвер и Пенелопе Круз во главните улоги. – Тоа е опера. Мелодрама. Сè што беше тој се судира со она што ќе стане. Тоа е спектакуларна мелодрама за вистинскиот живот, истакна режисерот сценарист.

„Жештина 2“ – Kurir.mk

Мајкл Ман го навести филмот „Жештина 2“