Половина од животинските видови во светот во опаѓање

Ивона Петрова — Tue, 23 May 2023 08:32:48 +0000

Речиси половина од животинските видови во светот денес минуваат низ фаза на намалување на популацијата, покажува ново истражување на Квинс Универзитетот во Белфаст, Северна Ирска. Трудот ги испитува промените во густината на населеноста на повеќе од 70.000 видови животни ширум целиот свет, и тоа го прави најсеопфатно проучување од ваков вид досега. Истражувачите сметаат дека наодиве се сериозно предупредување бидејќи светската загуба на биодиверзитетот предизвикана од човековата индустријализација е многу поалармантна отколку што се мислеше. Според наводите, 48 отсто од видовите на Земјата во мигов се соочуваат со опаѓање на вкупниот број. Степенот на исчезнување на видовите традиционално се мери под категориите на Меѓународната унија за зачувување на природата (ИУЦН), според кои на 28 отсто од животот на Земјата му се заканува исчезнување. Научниците открија и дека 33 насто од видовите кои досега се сметаа за „безбедни“, всушност се намалуваат и се изложени на зголемена опасност од исчезнување. Анализата посочува и дека недостатокот на видови со растечка популација покажува дека другите видови не се склони да го заземат местото на изумрените видови во екосистемот. - Овој нов метод на проучување и анализа на глобално ниво, дава појасна слика за вистинскиот степен на ерозија на светската биолошка разновидност што традиционалните пристапи не можат да ја обезбедат. Нашата работа е драстично предупредување за сегашната големина на оваа криза, што веќе има катастрофални последици врз стабилноста на природата во целина и врз здравјето и благосостојбата на луѓето, рече д-р Даниел Пинчеира-Доносо, виш предавач по еволутивна биологија и макроекологија на Квинс Универзитетот. Предводничката на проучувањата, Кетрин Фин потврди дека бројот на скоро половина од животните на Земјата за кои се достапни проценки, сега се намалува. - За да бидат работите уште полоши, и многу животински видови за кои се смета дека не се изложени на ризик од истребување, всушност се во прогресивен пад, додаде таа. Глобалното губење на биолошката разновидност се смета за еден од најголемите предизвици за човештвото наредните десетлетија, што влијае на екосистемите, производството на храна, ширењето на болести и стабилноста на светската економија.

Повеќе од 330 животински видови во светот се затруени со неуништливи хемикалии

Тале Кристо — Thu, 23 Feb 2023 21:27:24 +0000

Неуништливи хемикалии се пронајдени во повеќе од 330 видови диви животни ширум светот, покажа студија за вештачки хемикалии кои се користат во секојдневните производи како што се нелепливи тави, амбалажи за храна, теписи и мебел, пренесе британски Скај. Порталот наведува дека главната карактеристика на овие хемикалии е тоа што тие не се распаѓаат со текот на времето и се поврзани со рак и болести на црниот дроб, бубрезите и тироидната жлезда, а истражувачите веруваат дека супстанциите се класифицирани како контаминирачки или потенцијално штетни за 330 животински видови ширум светот, вклучувајќи поларни мечки, тигри, мајмуни, панди, делфини, птици и риби. Неуништливите хемикалии се користат од средината на минатиот век, а луѓето и животните можат да дојдат во контакт со нив со пиење контаминирана вода или јадење храна одгледувана или уловена во близина на местото каде што се произведуваат хемикалиите. Скај јавува дека Работната група за животна средина (EVG) со седиште во САД извршила голем проект за мапирање за да го нагласи степенот на ширење на недеструктивни хемикалии во животната средина користејќи истражување од повеќе од 100 неодамнешни студии за контаминација на животни. ЕВГ објави дека загадувањето со овие хемикалии е присутно насекаде, „од земја до земја и на сите континенти“. Групата повика на итно воведување национални и меѓународни регулаторни мерки за заштита на дивиот свет од контаминација со недеструктивни хемикалии.

животински видови – Kurir.mk

Половина од животинските видови во светот во опаѓање

Повеќе од 330 животински видови во светот се затруени со неуништливи хемикалии