златен накит – Kurir.mk

Странски државјанин осомничен за криумчарење златен накит, цариник осомничен дека му помагал

Катерина Бојаџиева — Wed, 22 Mar 2023 10:45:30 +0000

Основното јавно обвинителство Скопје донесе Наредба за спроведување истражна постапка против две лица, од кои едното е осомничено за кривично дело – Криумчарење од член 278 став 3 во врска со став 1 од Кривичниот законик, а второто за помагање при извршување на кривичното дело. На 20 март, на граничниот премин Аеродром Скопје, на влез во земјава, осомничениот 32-годишник со двојно турско и српско државјанство, пренел непријавена стока преку царинска линија. Станува збор за над 43 килограми разновиден накит, во вкупна вредност од 2.200.000 евра. Во тоа со умисла му помогнал вториот осомничен со отстранување на пречките за извршување на кривичното дело. Странскиот државјанин пристигнал со лет од Истанбул за Скопје и во просторот наменет за подигање на багажот го пречекал неговиот помагач, вработен во Царинската управа на РСМ, кој во тој момент не бил на смена и чија сестра патувала со истиот авион. Царинскиот службеник го зел багажот и од сестра си и од осомничениот, па ги ставил на количка за багаж, по што сите тројца се упатиле кон „зелениот коридор“ за излез од аеродромот без пријава на царинска стока. „Зелениот коридор“ бил затворен со безбедносна лента, па осомничениот цариник ја тргнал лентата и продолжил кон излезот. На тоа реагирал царинскиот службеникот кој го контролирал летот, но осомничениот се претставил како колега цариник и продолжил заедно со својата сестра и со осомничениот странски државјанин да се движи кон излезот. Тогаш интервенирале царинските службеници на смена, извршиле претрес на лицата и во ранецот на патникот од Истанбул пронашле 15 килограми златен накит, додека останатиот вреден накит бил пронајден во куферот на осомничениот натоварен на количката за багаж. Јавниот обвинител до судијата на претходна постапка од Основниот кривичен суд Скопје достави предлог за определување мерка притвор за двајцата осомничени, бидејќи постојат околности што укажуваат на опасност од бегство, можност да ги сокријат, фалсификуваат или уништат трагите на кривичното дело, да ја попречуваат кривичната постапка со влијание врз сведоци и услови да го повторат кривичното дело.

ФОТО: Спречен обид за криумчарење златен и сребрен накит на ГП „Богородица“

Магдалена Андонова — Thu, 01 Sep 2022 16:26:08 +0000

Царинската управа соопшти дека вчера, во вечерните часови, на граничниот премин „Богородица“ бил спречен обид за криумчарење златен и сребрен накит. Случајот го разоткриле царинските инспектори од мобилните тимови на Одделението за оперативни работи на Царинската управа. При спроведената детална контрола на камион со македонски регистарски таблички кој пренесувал стока од Турција, во празнина позади инструмент таблата во возачката кабина, се пронајдени непријавени кеси во кои имало 573 грама златен и 2 408 грама сребрен накит. Стокaта е привремено задржана и предметот е предаден на Одделението за истраги за понатамошна постапка.

ФОТО: Детски пелени полни со злато, вредно над 18.000 евра

Ивона Петрова — Tue, 09 Aug 2022 09:32:30 +0000

Српската Царина вчера во соработка со полицијата на граничниот премин Прешево со Северна Македонија спречија обидот на двајца патници во памперс пелени да прошверцуваат преку граница златен накит чија вредност се проценува на повеќе од 2,2 милиони динари (18.752 евра), јави дописникот на МИА од Белград. Како што соопшти Царинската управа, прекршокот бил откриен кога на влезот на овој премин во Србија бил издвоен на детален преглед автомобил „фолксваген пасат“ со швајцарски регистарски ознаки, во кој од правец на Македонија кон Швајцарија се движеле млад брачен пар. -Иако рекоа дека немаат што да пријават, царинскиот службеник при преглед на автомобилот, пред совозачкото седиште пронашол торба во која меѓу другото имало и неотворено пакување памперс пелени. Неговата необична тежина го подигнала сомнежот дека нешто се крие во него, што набрзо се испостави дека е вистина, бидејќи во неколку пелени се пронајдени речиси половина килограм златни ланчиња и алки со дукати „Франц Јозеф“, како и синџири и прстени, соопштија од Царината. Бидејќи вредноста на откриениот накит надминува една третина од вредноста на возилото, со судската одлука, покрај златото, трајно е одземено и возилото проценето на над милион динари.

Српската царина спречи шверц на златен накит кај македонски државјанин

Дарко Андоновски — Mon, 21 Feb 2022 15:02:06 +0000

Српските царински службеници на граничниот премин Батровци со Хрватска, спречија обид за шверц на 716 грама златен накит што македонски државајнин се обидел да го пренесе преку границата во својот багаж, јави дописникот на МИА од Белград. Златниот накит бил откриен во саботата, на 21 февруари кога на влезот на граничниот премин Батровци меѓу Хрватска и Србија, пристигнало возилото „шкода октавиа“ ВРС, со швајцарски регистарски таблички, со кое четири лица патувале од Швајцарија кон Северна Македонија. На јасно поставеното прашање на цариниците дали имаат што да пријават, па дури и на конкретното прашање дали со себе носат вредни предмети што треба да се пријават, сите патници одговорија дека со себе носат само личен багаж. Сепак, деталниот преглед ги демантираше нивните тврдења, бидејќи по прегледот на багажот, во два куфери покрај личните работи, била спакувана и поголема количина златен накит, кој никој не го ни спомнал. Станува збор за 716 грама разновиден накит, за кој како сопственик се пријавил патникот кој седел на задното седиште.

ФОТО: Запленет 5 килограми златен накит вреден 156.000 евра на Блаце

Ивона Петрова — Wed, 09 Feb 2022 11:02:23 +0000

Пет килограми златен накит вчера бил запленет на граничниот премин Блаце откако е пронајден во автомобил пријавен за излез од државата. -Имено, на 8 февруари 2022 година, на излез од државата, на граничниот премин Блаце, во попладневните часови за царинска контрола се пријавило патничко моторно возило со српски регистарски ознаки управувано од македонски државјанин. При вршење на детална контрола, од страна на мобилните тимови, биле забележани неправилности во пределот помеѓу двете предни седишта, односно шуплината над ауспухот била затворена. Во внатрешноста на возилото, во пределот помеѓу двете предни седишта, пронајден бил отворот на специјално изработениот бункер, во кој се наоѓале 10 пакети со златен накит во вредност од 9.604.430 денари и вкупна тежина од 5097,59 грама, информира Царинската управа. Златниот накит и патничкото моторно возило се привремено одземени, а пријавеното лице заедно со целокупната документација е предадено на Одделението за истраги во Сектор за контрола и истраги за понатамошно постапување, по што ќе биде поднесена соодветна кривична пријава.

Влегле во куќа и украле пари и златен накит – приведени двајца крадци од Скопје

Магдалена Андонова — Thu, 09 Sep 2021 13:24:48 +0000

На 07.09.2021 од страна на полициски службеници од Единицата за внатрешни работи Кисела Вода биле лишени од слобода Е.Х.(31) и П.П.(27) двајцата од Скопје поради постоење основи на сомнение дека на 31.08.2021 на ул.“Кумановска“ извршиле кривично дело кражба во куќа, при што одзеле пари и златен накит. Со нив бил извршен разговор во кој го појасниле начинот на извршување на кривичното дело. Се преземаат и дополнителни мерки и активности за расчистување и документирање на делото, по што ќе следува соодветен поднесок.

Српски цариници кај македонски државјанин нашле шверцуван 735 грама златен накит

Магдалена Андонова — Mon, 06 Sep 2021 15:16:30 +0000

На граничниот премин Прешево-Табановце, српските цариници во автомобил БМВ со швајцарски регистарски ознаки, управуван од државјанин на Македонија, во кеси зад возачкото седиште пронајдоа 735 грама златен накит, јави дописникот на МИА од Белград. -На прашањето на цариникот дали има нешто да пријави, возачот одговори негативно, но деталната проверка на БМВ го покажа спротивното, соопштија од Управата на царината на Србија Како што се посочува, во кесите зад возачкото седиште, цариниците пронашле вистинско мало богатство – 735 грама тежок златен накит, спакуван во кутии. Меѓу пронајдениот накит, најбројни беа нараквици, а најмасивен предмет беше богато украсен ѓердан, тежок 122 грама. Проценетата вредност на откриениот накит ја надминува сумата од 20.000 евра, или 2,5 милиони динари. Имајќи предвид дека станува збор за странски државјанин, прекршочната постапка се водеше по итна постапка, и судот изрече парична казна и заштитна мерка трајно одземање на непријавените вредни предмети, се наведува во соопштението. (МИА)

Со закани од неговата снаа одзел златен накит и пари – приведен 55. годишен разбојник од с.Дебреште

Магдалена Андонова — Tue, 17 Aug 2021 14:23:53 +0000

На 16.08.2021 полициски службеници од ОВР Прилеп го лишиле од слобода В.А.(34) од с.Дебреште, општина Долнени и против него до ОЈО Прилеп е поднесена кривична пријава, поради постоење основи на сомнение за сторено кривично дело „разбојништво“ по член 237 од Кривичниот законик. Пријавениот, на 16.08.2021 во 03.50 часот во куќата на С.Р.(55) во с.Дебреште од неговата снаа со закана одзел златен накит и пари. Од судија на претходна постапка на лицето му е одредена мерка притвор.

Уапсени тетовци кои украле златен накит од куќа

Ивона Петрова — Thu, 20 Dec 2018 14:13:58 +0000

Тетовската полиција вчера уапсила две лица поради сторена тешка кражба. -Лишени од слобода се Ш.И.(26) и Б.Ќ.(26) двајцата од Тетово, поради сторена тешка кражба на златен накит, извршена на 18-ти овој месец во куќа во Тетово. При тоа, кај Б.Ќ. пронајдени и одземени се златен накит и нож, информираат од МВР. Дел од одземениот накит во кражбата е вратен на сопственикот на куќата.

Украл пиштол и злато од таткото на сопругата за да се раздолжи

Ивона Петрова — Thu, 01 Mar 2018 13:48:54 +0000

Секторот за внатрешни работи Тетово поднесе кривична пријава против Е.К. (29) од Тетово поради постоење основи на сомнение за сторено кривично дело „кражба“ и против Б.А. (33) од Тетово поради постоење основи на сомнение за сторено кривично дело „прикривање“. -Во текот на декември 2017 година, во село Урвич, Е.К. при згодна прилика го одзел клучот од куќата на таткото на неговата сопруга, кој е на привремена работа во Италија. После тоа, отишол во куќата и одзел сигнален пиштол „Екол мајор“ калибар 9 мм, кој сопственикот го поседувал со одобрение и златен накит и бижутерија, со што му нанел штета од околу 120.000 денари, информираат од МВР. По ова, Е.К. му го дал пиштолот на Б.А. како надомест за долг што го имал кон него.