злоупотреба на лични податоци – Kurir.mk

Злоупотребиле лични податоци на тројца лекари за да рекламираат чај: Еве каква казна добија физичко и правно лице

Ивана Ефремовски — Wed, 04 Oct 2023 11:33:44 +0000

Основното јавно обвинителство Скопје до надлежниот суд поднесе Предлог за издавање казнен налог против едно физичко и едно правно лице, кои се обвинети за три кривични дела – Злоупотреба на лични податоци од член 149 од Кривичниот законик. Обвинетиот 34-годишник, како одговорно лице во правното лице, во периодот од ноември 2022 до април 2023 година, спротивно на условите утврдени во член 10 и член 96 од Законот за заштита на лични податоци, без согласност на тројца оштетени лекари, ги користел нивните лични податоци – слика, име и презиме за он-лајн продажба на два производа. Личните податоци на секој од оштетените лекари биле злоупотребени како тие со својот професионален авторитет да ги рекламираат и препорачуваат чаевите Паразол (Parazol) и Хипертеа (Hypertea), кои на територијата на државава ги увезувало и дистрибуирало обвинетото правно лице. Лажните интервјуа и постови, преземани и споделувани на повеќе веб страници и социјални мрежи, со здравствени тврдења и лажни медицински препораки за овие производи кои оштетените никогаш не ги дале, обвинетиот ги искористил за незаконита обработка на личните податоци и директен маркетинг. Надлежниот јавен обвинител му предложи на Судот да ги огласи за виновни и одговорното лице да го казни со единствена парична казна од 70 дневни глоби со висина на дневната глоба од 30 евра во денарска противвредност, а правното лице да го казни со единствена казна од 300.000 денари. Согласно предлогот на обвинителството, обвинетите по пресудата ќе треба да ги надоместат трошоците на постапката, а секој од оштетените лекари ќе има можност во граѓанска постапка да си го оствари своето имотно-правно побарување за нанесената штета со злоупотребата на личните податоци.

Внимавајте на кого му давате лични податоци: Начинот на кој бил измамен ОВОЈ Македонец, нека ви биде лекција

Ивана Ефремовски — Thu, 29 Dec 2022 16:24:42 +0000

СВР Штип поднесе кривична пријава против П.С.(31) од Струга поради постоење основи на сомнение за сторени кривични дела „измама“, „злоупотреба на лични податоци“ и „оштетување и неовластено навлегување во компјутерски систем“ и против А.К.(39) од Скопје поради постоење основи на сомнение за сторени кривични дела „помагање“ во врска со „измама“, „злоупотреба на лични податоци“ и „оштетување и неовластено навлегување во компјутерски систем“. Првопријавениот, на 01 и 02 октомври 2021 година, со лажно прикажување на факти, искористил лични податоци на друго лице и во четири наврати во негово име електронски аплицирал за кредит на веб страни на четири финансиски друштва, од каде му биле одобрени средства од вкупен износ од 97.000 денари. По ова, П.С. ги употребил средствата од платежната картичка на лицето и извршил 16 успешни трансакции кон домашни и странски прави лица. Второпријавената А.К. се претставувала и потпишувала во друго име при вршењето на нарачките и приемот на производите кои потекнуваат од горенавадените кривични дела и притоа дел ги задржувала за себе, а дел ги предавала на првопријавениот.

Кривична пријава за две млади лица, злоупотребувале лични податоци и подигале кредит во туѓо име

Магдалена Андонова — Mon, 03 Oct 2022 15:04:20 +0000

СВР Струмица поднесе кривична пријава против М.М.(28) од Прилеп и А.Љ.(24) од Ново Село, поради постоење основи на сомнение за сторени кривични дела „злоупотреба на лични податоци’’ и „фалсификување или уништување деловни книги’’. Првопријавениот, вработен во финансиско друштво за брзи кредити, заедно со второпријавениот, кој претходно набавил фотографија од лична карта на оштетеното лице, ги злоупотребиле личните податоци на оштетениот и на негово име и негова сметка во четири наврати подигнале кредит од правното лице износ од 53.000 денари со затезна камата од 32.870 денари.

Девојка од Неготино на Фејсбук објавувала невистини- си заработи кривична

Катерина Бојаџиева — Thu, 05 Aug 2021 17:02:27 +0000

СВР Велес поднесе кривични пријави против Х.М.(28) од Неготино, поради постоење основи на сомнение за сторени кривични дела „оштетување и неовластено навлегување во компјутерски систем“ и „злоупотреба на лични податоци“. На 15.01.2020 пријавената ги презела личните податоци на Б.Г.(59) од Неготино, по што на социјалната мрежа „Фејсбук“ објавувала невистини за него и неговата сопруга. Исто така, пријавената во текот на јануари 2021, незаконски ги прибавила личните податоци од Н.Ф.(48) од Неготино, ги употребила без нејзино знаење на социјалните мрежи, креирала лажен профил и објавувала невистини за неа.