зои 2018 – Kurir.mk

Истрага во Пјонгчанг – продавале кучешко месо покрај салите каде се одржуваат ЗОИ

Ивона Петрова — Sun, 18 Feb 2018 10:15:27 +0000

Организациониот комитет на Олимписките игри во Пјонгчанг истражува сигнали за ширење на кучешко месо покрај спортските капацитети. Сон Пек Ју објасни дека во провинцијата Канвондо, каде што се одржуваат игрите, има околу 200 кучешки фарми кои изработуваат и продаваат деликатеси. -Дознавме од медиумите дека покрај спортските објекти се продава кучешко месо. Ги проверуваме информациите, но до моментов немаме потврда дека тоа реално се случува. Во денешно време се повеќе Корејци одгледуваат кучиња за домашни миленици и традицијата да се јаде нивното месо постепено умира, објаснува Сон Пек Ју. Секоја година околу 2 милиони кучиња од месо се убиени во Република Кореја.

Антонио Ристевски не ја заврши трката во велеслалом

Ивона Петрова — Sun, 18 Feb 2018 08:36:16 +0000

Македонскиот репрезентативец Антонио Ристевски имаше неуспешен настап на велеслаломската трка на Зимските олимписки игри во Пјонгчанг. Нашиот скијач не успеа да ја заврши патеката, останувајќи без пласман на ова натпреварување. Ристевски по првото мерно време имаше време од 17,94 секунди, што беше заостанување од 1,24 секунди од тогаш водечкиот скијач, меѓутоа нашиот скијач излета од патеката и не успеа да стигне до целта. Ристевски е најискусен од нашите тројца олимпијци во Пјонгчанг, а пред четири години во Сочи заврши на 29. место во оваа дисциплина.

ВИДЕО: Хорор повреда на ЗОИ, олимпиец си го скрши вратот

Ивона Петрова — Fri, 16 Feb 2018 08:50:25 +0000

Австриецот Маркус Шајрер преживеа кошмарен пад во четвртфиналето на сноуборд крос. Тој изгуби контрола по еден од последните скокови во својата 1/4-финална серија и приземји на грб, но сепак успеа да ја заврши трката. Прегледите потоа покажале дека има скршена петтиот вратен пршлен, но тој ги движи своите екстремитети и нема да има посериозни пречки. 30-годишниот спортист ќе биде пренесен во Австрија, каде ќе помине посериозни прегледи.

Böser Sturz von Markus #Schairer im #Snowboard Boardercross. Halswirbelbruch, aber Ärzte befürchten keine Folgeschäden #PyeongChang2018 pic.twitter.com/iaptkStpYW
— Lukas Zahrer (@ZaraLuk) February 15, 2018

„Ако те најдам, ќе умреш“, закани за канадска олимпијка

Ивона Петрова — Wed, 14 Feb 2018 10:35:31 +0000

Канадската лизгачка на кратки патеки Ким Бутен доби закани и навреди на социјалните мрежи од лути навивачи од Јужна Кореја, откако го освои бронзениот медал во дисциплината 500 метри. 23-годишната Бутен на финалната трка вчеравечер заврши на четвртото место, но подоцна беше рангирана трета, бидејќи претставничката на домаќинот на ЗОИ Минджеон Чои, која финишира втора, беше дисквалификувана. Корејците сметаат дека одлуката била донесена погрешно и Чои не ги прекршила правилата против Ким Бутен. - Честитки за нечесно заработени медал, напиша гневен навивач кај личниот профил на канадската натпреварувачка на кратки патеки. - Ако те најдам, ќе умреш, беше постирано од друг корисник на социјална мрежа. По овие пораки Канаѓанката го блокира профилот. Трките на куси патеки е еден од омилените спортови на луѓето од Република Кореја. Од Интернационалниот олимписки комитет (ИОК) апелираат да се почитуваат спортистите и да се поддржат во нивната напорна работа за постигнување што подобри резултати.

Ставре Јада последен во квалификациите на спринтот

Ивона Петрова — Tue, 13 Feb 2018 10:22:11 +0000

Симболичен беше денешниот настап на Ставре Јада, првиот Македонец кој се појави на Зимската олимпијада во Пјонгјанг. Јада се појави на стартот на квалификациската трка спринт класично на 1,4 км. и заврши на 80.место. Македонецот на целта стигна со време 4:23.85 минути, односно 1:15.31 минута побавно од првопласираниот. Најдобро време во квалификациите оствари Ристомати Хакола – 3:08.54 минути. Пласман во следната фаза обезбедија најдобрите 30 спринтери.

Скандал на ЗОИ, откриен прв случај на допингуван спортист

Ивона Петрова — Tue, 13 Feb 2018 10:13:57 +0000

Јапонскиот лизгач Кеи Саито е првиот учесник на ЗОИ во Јужна Кореја кај кого е откриено користење недозволени супстанци. Саито кој се натпреварува во брзо лизгање падна на допинг тестот спроведен ден по неговото пристигнувањето во Пјонгјанг. Јапонецот користел ацетазоламид, супстанца која се користи за прикривање на трагите на други забранети супстанции кои придонесуваат за подобрување на спортски перформанси. Тој е суспендиран од неговата репрезентација и вратен дома, а допрва го очекува санкција од МОК. Спортистот негира користење на недозволени средства. - Никогаш не сум се обидел такво нешто. Поминав и анти-допинг обука и никогаш не би користел стероиди. Сакам да ја докажам мојата невиност. Ја прифаќам одлуката на репрезентацијата со цел да не бидам товар за тимот, рече Саито.

ВИДЕО: Олимпијка изведе еден од најтешките елементи во лизгање

Ивона Петрова — Mon, 12 Feb 2018 14:38:45 +0000

Американската лизгачка од јапонско потекло Мираи Нагасу на Зимските олимписки игри во Пјонгјанг изведе троен аксел, елемент кој ретко се гледа во женска конкуренција. Тоа е еден од најтешките елементи во овој спорт, а Нагасу стана првата Американка која го извела на зимските игри и трета лизгачка во историјата. Иако тројниот аксел таа го изведе за време на тимското натпреварување, сепак тимот на САД дојде само до бронзата, додека Русите беа втори, а Канада е новиот шампион.

Андерсон првата сноубордистка која го одбрани златото

Ивона Петрова — Mon, 12 Feb 2018 08:29:08 +0000

Џејми Андерсон од САД го освои златниот медал во дисциплината слоупстајл (жени) на Олимпијадата во Пјонгчанг и стана првата сноубордистка која го одбрани првото место од претходната Олимпијада во Сочи 2014 година. Сребренито медал го освои Лори Блуан од Канада, додека трето пласирана и носителка на бронзениот медал е Ени Рукајарави од Финска. И во оваа дисциплина силниот ветар им правеше многу проблеми на натпреварувачките, а неколку од нив паднаа и не го завршија натпреварувањето. МИА

Канадскиот тим најдобар во уметничко лизгање

Ивона Петрова — Mon, 12 Feb 2018 08:28:22 +0000

Репрезентацијата на Канада го освои златниот медал во тимското натпреварување во уметничко лизгање на Зимските олимписки игри во Пјонгчанг. За канадската репрезентација настапија Патрик Чен, Кејтлин Озмонд, Габриел Дејлман, Меган Дјуамел, Ерик Редфорд, Теса Вирту и Скот Моар. Ова е прво злато за Канада на Олимпијадите во оваа дисциплина. Второто место им припадна на руските натпреварувачи кои освоија 66 бода, седум помалку од победникот. На победничкиот подиум се искачија и лизгачите од САД кои на крајот собраа 62 бода.

Силниот ветар го одложи женскиот велеслалом

Ивона Петрова — Mon, 12 Feb 2018 08:27:30 +0000

Велеслалом кај жените на Зимските олимписки игри во Пјонгчанг што требаше да се вози ноќеска е одложен поради силен ветар. Првиот старт беше закажан во 2 часот и 15 минути по македонско време, но условите не дозволуваа нормалното одржување на трката. Ако дозволат временските услови велеслаломот ќе се вози на 15 февруари. Ова е второ натпреварување од алпско скијање што е одложено поради неповолни временски услови. Претходно истото се случи и со машкиот спуст. Новиот термин за најбрзата алпска дисциплина кај мажите исто така е четврток (15 февруари), па поради тоа и машкиот супервелеслалом е поместен за еден ден и тој е предвиден за 16 февруари.