Зоран Милевски Кичеец – Kurir.mk

Се огласија од Управата за извршување санкции, еве каква била здравствената состојба на Кичеец и зошто добил прекин на казната

Ивона Петрова — Mon, 06 Sep 2021 12:38:00 +0000

Управата за извршување санкции се огласи со соопштение во кое детално наведува зошто осудениот Зоран Милески викан Кичеец кој во саботата учествуваше во сообраќајна несреќа, добил прекин на затворската казна. -Со решение на УИС од 10.08.2021 година, на осудениот Зоран Милески му е одобрен прекин на издржувањето на казната затвор во согласност со чл.225 ст.1 од Законот за извршување на санкциите. Казната затвор која оваа осудено лице ја издржува во КПД од отворен вид Струга му се прекинува во времетраење од 30 дена и тоа од 10.08.2021 година до 09.09.2021 година на кој ден иститот треба да се врати во КПД Струга и да продолжи со издржување на казната. Прекинот од 30 дена не му се засметува во вкупната казна затвор, а истиот му беше одобрен од причина што на Управата за извршување на санкции осудениот кон своето барање за одобрување на прекин поради влошена здравствена состојба, достави и специјалистички извештаи од лекарски прегледи извршени на 06.08.2021 година и на 09.08.2021 година во ЈЗО Завод за превенција, лекување и рехабилитација на кардиоваскуларни заболувања ,,Св.Стефан'' во Охрид. Во специјалистичките извештаи е наведено дека пациентот се јавил на преглед поради чувство на забрзана срцева работа, градна болка, дспинеја и видлива агитираност кои се јавиле после интезивен психички и физички стрес, еден час пред преглед. Пациентот поставен на хемодинамски мониторинг, ординирана терапија со amp.Presolol и amp.Cordarone и седација, после која дојде до нормализирање на срцевата фреквенција. Дијагнозата за која специјалистот навел дека е потребно да се продолжат медицински иследувања е ,,Суправентрикуларна тахикардија'' и индицирани и закажани се ехокардиоградија, холтер EKG, Холтер ТА, колор доплер сонографија на каротидни артерии, KCT, а препишана е и соодветна медикаментна терапија. Со оглед на фактот дека е потребно повеќедневно испитување, одлучено е како што е погоре наведено, велат од Управата за извршување санкции.

Спасовски се огласи за сообраќајката во која учествуваше Кичеец

Ивона Петрова — Mon, 06 Sep 2021 11:39:49 +0000

Министерот за внатрешни работи, Оливер Спасовски при денешната посета на реконструираниот објект на СВР Куманово, одговарајќи на новинарски прашања до каде е истрагата за сообраќајната несреќа во која е вклучен Зоран Милески-Кичеец и дали има вклучено српски државјани, рече дека стручните служби работат на утврдување на одговорноста. – Јас искрено жалам што се случи сообраќајна незгода и што има починато лице, тоа е најголемата загуба, за сите други аспекти ќе се произнесат сите други експери во МВР, точно ќе се утврди кој е виновен и тој ќе мора да носи одговорност. Ги имаме ние идентитетите, се работи на тоа и ако има каква каква било поврзаност, со нешто сомнително за тоа ќе се преземат мерки, изјави министерот. Спасовски одговарајќи на новинарско прашање зошто на презентацијата на реконструираниот објект на СВР Куманово не присуствува кумановскиот градоначалник Максим Димитриевски рече дека ниту еден од кандидатите за градоначалници не е поканет на настанот.

Детали за трагедијата: Познат идентитетот на починатиот маж, а еве со кое возило управувал Кичеец

Ивана Ефремовски — Sun, 05 Sep 2021 09:36:15 +0000

На 04.09.2021 околу 15:30 часот било пријавено дека на магистралниот пат Гостивар-Кичево, во близина на новоселски гробишта во с.Ново Село се случила сообраќајна незгода помеѓу патничко моторно возило “мерцедес“ со кичевски регистарски ознаки, управувано од З.М.(41) од Охрид, патничко моторно возило “бмв“ со тетовски регистарски ознаки, управувано од Е.Н.(23) од с.Радиовце-тетовско, и товарно моторно возило “фургон сангјонг“, со гостиварски регистарски ознаки, управувано од Б.Љ.(32) од с.Д.Бањица-гостиварско. На местото на незгодата починал сопатникот од товарното возило С.Е.(34) од Гостивар. Со тешки телесни повреди се здобиле двајца сопатници од возилото “мерцедес“ П.Ж.(51) и М.М.(42) двајцата од Р.Србија, сопатникот од товарното моторно возило М.К.(31) од Гостивар и возачот Б.Љ., а со телесни повреди повреди се здобиле возачите З.М. и Е.Н. како и сопатникот од возилото “бмв“ Р.Р.(23) од с.Г.Палчиште-тетовско констатирани во Ургентниот Центар во Гостивар. Извршен бил увид на местото на настанот од увидна екипа од Полициската станица Гостивар во присуство на Јавен обвинител.

Кичеец на 12-ти октомври оди во затвор

Ивана Ефремовски — Wed, 23 Sep 2020 11:58:00 +0000

Зоран Милевски-Кичеец нa 12 октомври треба да се појави во затворот Шутка. Упатниот акт го примил и треба да ги одлежи трите години затвор досудени во случајот “Рекет”. Засега нема информација дали тој ќе бара одлагање на казната. Кичеец беше осуден во Рекет откако призна вина за изнудата на над еден милион евра од бизнисменот Орце Камчев. Освен него во овој случај осудени се и Бојан Јовановски или Боки 13 на девет години затвор како и поранешната шефица на Специјалното обвинителство, Катица Јанева која доби седум години затвор.

Кичеец ќе оди во затвор

Ивана Ефремовски — Mon, 21 Sep 2020 11:29:11 +0000

Осудениот во случајот Рекет, Зоран Милевски – Кичеец следниот месец ќе треба да почне да ја издржува затворската казна. Ова го потврдуваат од кривичниот суд од каде не кажуваат точно кој датум му е одреден за да се појави, а за сега не откриваат ниту за во кој затвор доби упатен акт, објави Телма. Велат дека одлуката сега се испраќа до него па тоа е причната поради која не откриваа детали, се додека тој не потврди дека ја примил. Рокот е 30 денови, но Милевски има можност да бара да се одложи неговото одење во затвор од повеќе причини како што се болест, смрт или тешка болест на близок, за да заврши неодложни работи, или пак за да се грижи за деца или немоќни лица. Тој на стартот на процесот призна вина по што веднаш ја доби и пресудата. Освен Кичеец во истиот процес на 7 годишна затворска казна е осудена екс специјалната обвинителка Катица Јанева и на девет годишна затворска казна неформалниот соспственик на поранешната 1ТВ, Бојан Јовановски.

Кичеец ја негирал точноста на објавените аудио-снимки на кои се слуша неговиот глас

Ристе Здравков — Thu, 02 Jul 2020 16:19:50 +0000

Денес Зоран Милевски-Кичеец бил повикан во полициската станица Карпош заради аудио-снимките кои беа објавувани на „ЈуТјуб“ а на кои се слуша гласот на Кичеец. Во полициска станица, Кичееец пристигнал со својот адвокат, а распитот траел околу час и половина. Неофицијално, „Инфомакс“ дознава дека за време на распитот Кичеец ја негирал точноста на снимките кои биле објавени, односно, дека не биле вистинити.

Катица Јанева ќе даде завршни зборови во „Рекет”

Ивона Петрова — Tue, 02 Jun 2020 05:36:09 +0000

Поранешната специјална обвинителка, сега обвинета во случајот „Рекет”, Катица Јанева, денеска во Кривичниот суд ќе ги даде своите завршни зборови за овој судски предмет, по што ќе се отвори патот да се закаже рочиште за објавување на пресудата. Освен обвинетата Јанева, се очекува завршни зборови да дадат и нејзините бранители. Претходно, на вчерашното рочиште за „Рекет”, завршен збор имаше и првообвинетитот Бојан Јовановски – Боки 13, кој рече дека обвинението е засновано само врз изјавата на Јордан Камчев. Според Јовановски, Камчев можеби дал милион евра, а можеби и повеќе, но не на него. Тој негира вина и тврди дека обвинението против него е политичка конструкција. Судењето за предметот „Рекет” почна во ноември минатата година. Обвинението беше поднесено против три лица. На првото рочиште за овој случај обвинетитот Зоран Милевски-Кичеец ја прифати вината и на следното рочиште беше осуден на три години затвор. Другите двајца обвинети Јовановски и Јанева, се изјаснија дека се невини и против нив се води судска постапка во која беа презентирани низа материјални и вербални докази од страна на Обвинителството. Исто така, и самите обвините презенитираа докази, односно со предлог на обвинетата Јанева, пред судот сведочеа неколку обвинители и истражители од поранешното Специјално јавно обвинителство.

Боки 13: Кичеец е ослободен од домашен притвор за да спроведува политичка агенда

Тале Кристо — Mon, 01 Jun 2020 12:54:23 +0000

Бојан Јовановски пред судот презентираше фотографии направени во текот на вчерашниот ден на кои се гледа Зоран Милевски – Кичеец како слободно се шета, иако е префрлен во домашен притвор. На фотографиите може да се забележи Кичеец во друштво со еден директор, и неговата, како што вели Јовановски „паравојска“. Според Боки 13, Кичеец е пуштен во домашен притвор со агенда. Политичка агенда како што вели Јовановски.

Јавноста исклучена од слушање на материјатели од УСБ-то на Кичеец

Ивона Петрова — Tue, 18 Feb 2020 10:27:44 +0000

Вратите од судницата каде денеска се одржува рочиштето за случајот „Рекет“ останаа затворени за јавноста. Зад затворени врати ќе се емитуваат уште три разговори кои на УСБ стик до Судот ги доставил веќе осудениот во Рекет, Зоран Милевски Кичеец. -Инаку денеска пред да се почнат да се емитуваат овие разговори Вилма Русковска заврши со изведување докази обезбедени преку ПИ мерки како и претставување на анализата на вештачењето на телефонската комуникација на обвинетите, пишува Алсат. Иако и Катица Јанева и Боки 13 инсистираа разговорите да ги чуе и јавноста, обвинителката Русковска посочи дека со јавно емитување ќе се загрози угледот на лица кои се споменуваат во разговорите. Токму на ваквиот став реагираа обвинетите со објаснување дека при презентација на доказите кои до нив ги доставил бизнисменот Орце Камчев, на јавен линч биле изложени нивните семејства пријатели и блиски роднини. Судот донесе одлука и го прифати предлогот на Русковска разговорите да ги слушнат само судиите и обвинетите.

На „Рекет“ ќе бидат презентирани разговори од усб-то на Кичеец

Дарко Андоновски — Tue, 18 Feb 2020 08:07:26 +0000

Во Кривичниот суд во Скопје денеска продолжува судењето за предметот „Рекет” во кој обвинети се Бојан Јовановски – Боки 13, поранешната специјална обвинителка Катица Јанева и Зоран Милевски- Кичеец кој пак на првото рочиште призна вина и беше осуден на три години затвор. На денешното рочиште, како што е најавено, ќе бидат пуштени преостанатите три фолдери од усб-то на Зоран Милевски-Кичеец. Претходно, обвинителството побара тие да не бидат изведени зошто не се релевантни за кривично правниот настан, но вчера Русковска побара тие да бидат изведени, за со цел, како што рече, да не се остава впечаток дека обвинителството прикрива некои докази. Случајот се наоѓа во доказна постапка и го води судијката Васка Николовска-Масевска, а застапник на обвинението е Вилма Русковска. Основното јавно обвинителство за гонење организиран криминал и корупција во октомври годинава поднесе обвинение против Бојан Јовановски, Катица Јанева и Зоран Милевски. Првообвинетиот Јовановски се сомничи дека сторил кривично дело „перење пари и други приноси од казниво дело“ и за „примање награда за противзаконито влијание“. Второобвинетата Јанева се товари дека сторила кривично дело „злоупотреба на службена положба и овластување“. На првото рочиште за „Рекет“, што се одржа на 3-ти декември минатата година, третообвинетиот Зоран Милевски-Кичеец призна вина за делото „примање награда за противзаконито влијание“, по што беше осуден на три години затвор.