зорица чавкова – Kurir.mk

Ќерката на Митко Чавков демантира за било каков имот во Грција: Татко ми е цел на брутална тортура од страна на властите

Дарко Андоновски — Wed, 13 Mar 2019 12:18:33 +0000

Ќерката на поранешниот директор на Бирото за јавна безбедност Митко Чавков на својот Фејсбук профил објави статус во кој пишува дека врз нејзиниот татко се случува прогон и тортура од страна на властите. -Почитувани претставници на дипломатскиот кор во земјава, дозволете ми да ве известам за политичкиот прогон кој се случува врз татко ми ( Митко Чавков ) , кој е цел на брутална тортура од страна на властите. Имено на 12.03.2019 година на само две дена пред изрекување на пресудата, татко ми е лишен од слобода и однесен во притвор, без образложение и без доказ, обвинителството се повикува на некаква службена белешка, без извор и без поткрепа дека татко ми поседува вила на Халкидки ( Грција ) каде као што тврдат тие планирал да бега. Најостро демантирам дека татко ми или моето семејство поседува било каков имот во соседна Грција и сето наведено е една груба лага, која има за цел оправдување на политичкиот притвор. Притворањето на човек неколку дена пред да биде изречена пресудата е преседан за правото во државата и демократскиот свет, тоа го потврди и ценетиот професор на правниот факултет во Скопје, Гордан Калајџиев, кој во гостување на тв 21 изречно кажа дека се работи за до сега невидена работа, која упатува на тоа дека пресудата впрочем е однапред донесена. Ваши екселенции токму поради сето горе наведено се сомневам на политички притисок и прон врз татко ми кој трае подолго време. Дополнително сакам да потсетам на неправедниот начин на амнестија со кој беа ослободени директните причинители на настанот ( пратениците кои го извршија делото ) додека татко ми, кој во тоа време од позиција на професионалец се заложи максимално да не дојде до уште понесакани последици, делуваше според устав и закон и ги спаси животите на пратениците е цел на апсење и малтретирање невидено за цивилизирана Европа. Сакам да потсетам и дека властите се изживуваа врз татко ми за време на неговото прво притворање па беа вадени слики од притвор ( што е против правно и казниво согласно КЗ ) само за да го понижат. Кој ја нарача службената белешка? Обвинителката Вилма Русковска немала потреба да се сомнева во наодите од службената белешка! Апелирам до вас да го разгледате целиот случај и да излезете со поддршка, не поради Митко Чавков, туку заради правото и владеењето на правото во оваа држава, стои во нејзиниот статус на Фејсбук.

Сопругата на Чавков уште во декември го известила ЈО за адресата на која што живеат (ФОТО)

Ивана Ефремовски — Thu, 05 Apr 2018 11:35:51 +0000

Ќерката на Митко Чавков, Зорица Чавкова, на својот Фејсбук профил го објави писмото кое сопругата на Чавков, Јасмина Чавкова го испратила до Обвинителството со кое информира за адресата на која што живеат. Писмото е испратено на 15-ти декември 2017-та година. Со истото, Чавкова го известува ЈО дека живеат на адреса во населба Лисиче, а не на адресата која е наведена во личните документи, односно во стан во општина Центар. -За адресата на татко ми се известени на 15.12.2017 година. И сега што правиме? Спин е дека е тепач, дека се степал во затворот па го преместиле во Шутка. Спин е дека самоволно одредил каде ќе ја извршува мерката домашен притвор. Спин е дека доживеал инфаркт и сликан е во Шутка. На добар пат сте да ми го уништите семејството, пишува Чавкова на Фејсбук.

Зорица Чавков: Ова e одмазда врз Митко Чавков затоа што истражуваше криминал на функционери од актуелната власт

Ивона Петрова — Mon, 02 Apr 2018 16:58:48 +0000

Теророт и изживувањата кон обвинетите од 27 април и нивните семејства не престанува. Откако Врховниот суд донесе решение со кое мерката притвор се заменува со куќен притвор за Митко Чавков поранешниот министер за внатрешни работи и директор на БЈБ, за неполни 24 часа Чавков повторно се најде во истражниот затвор Шутка. Ова е преседан на македонското правосудство и ќе остане уште долго да се памети. За тоа како се одвивал овој терор во вчерашната емисија на Васко Ефтов, раскажа Зорица Чавкова, ќерка на Митко Чавков, која била со својот татко кога полицијата го апсела по втор пат. - Околу еден и триесет после полноќ повторно заѕвони полицијата пред врата. Јас се разбудив прва и претпоставував дека се дојдени за да проверат дали татко ми е физички присутен. Симнувајќи по скалите, ѕирнав низ прозорот да видам што точно се случува, бидејќи не бев сигурна. Но, видов полна улица со полициски коли, специјални единици, вели Чавкова. Таа објаснува дека го разбудила татко и, но не и останатите, бидејќи знаела дека нешто лошо се случува. -Татко ми кога стана се упати кон вратата и им рече: Добро вечер колеги, тука сум. Еден од полицајците му рече да се потпише на новото решение. Ни на крај памет ни мене ни на татко ми не ни дојде дека повторно нешто лошо ќе се случи и почна да го потпишува решението. Додека сето ова се случува, еден од колегите, тивко како да му беше непријатно да го каже тоа само рече: Полека спремајте се, треба да дојдете со нас, продолжи да објаснува Зорица Чавкова. Како една од причината за ова изживување и одмазда кон нејзиниот татко, Чавкова, го наведе фактот дека тој како министер за внатрешни работи истражувал многу криминал поврзан со некои личности од актуелната власт на СДСМ. - Преку 30 години има стаж во полицијата. Му ја повредија честа и интегритетот. За него тоа секогаш беше најважно, самата правна квалификација на делото тероризам за него е нешто неприфатливо, изјави Чавкова. Чавкова додаде дека оваа што го прават врз нејзиниот татко е само тенденција да го направат главен виновник и терорист, но на крај цела оваа приказна што ја креираат ќе заврши и ќе се дознае дека тој не е виновен за настаните од 27 ми април. Чавкова раскажа низ голготата која поминал нејзиниот татко кога бил пуштен во домашен притвор. Таа објасни дека денот кога прв пат го приведувале го земале од сегашната адреса во која живеат, но откако го пуштиле во домашен притвор го оставиле на улица пред станот кој бил во надлежност на МВР. Но, во тој стан како што рече таа немале ништо, бидејќи добиле решение во рок од 10 дена да се иселат, а за тоа имало и слики во јавноста каде што јасно се гледало како се иселуваат од тој стан. -Го вратија на издржување на мерка домашен притвор на адреса каде што тој стан е празен, ние сме иселени од тој стан, станот е во сопственост на МВР. Ние добивме решение за иселување од тој стан во рок од 10 дена. Сите се запознаени со тоа, дури и во јавноста имаше слики како ние тој ден се пакувавме, Чавков сликан како товара во комбе. Сите знаеја дека на таа адреса нема никој, тој е празен стан, не е во наша сопственост, немаме клучеви, немаме ништо. Го оставија таму на улица, на паркингот и си заминаа. Татко ми остана сам на улица, јас и брат ми отидовме го земавме и го однесовме на местото каде што живееме, изјави Чавкова. Таа за начинот на кој го апселе Митко Чавков рече дека еден од полицајците му ставил лисици на рацете и му рекол „Едвај го чекав тој ден кога ќе ти ставам лисици на раце“. Таа спомна дека постојано добивале закани, пораки со вулгарни содржини, а здравјето на нејзината мајка значително се влошило.