Компанијата „АТС Грoуп“ донира 500.000 заштитни маски и 20.000 тестови за ковид-19 на Министерството за здравство, за потребите на јавниот здравствен систем во напорите за справување со корона вирусот. Тестовите за ковид-19 ќе бидат распределени во Институтот за јавно здравје на територија на целата држава, со што ќе се овозможи тестирање на поголем дел од населението. Заштитните маски, информира денеска компанијата, се транспортираат од Народна Република Кина и наскоро ќе пристигнат во земјава.

– Борбата против ширењето на ковид-19 може да ја добиеме само ако делуваме обединето. Ситуацијата е деликатна за сите нас, но искрено сметам дека секој може да помогне на некаков начин. Ние во „АТС Гроуп“ одлучивме во рамките на можностите да ѝ помогнеме на нашата држава. Ќе продолжиме и понатаму да се трудиме да бидеме вистински партнер – вели Шефшет Демировски, сопственик на „АТС Грoуп“.

Како што истакнува Демировски, и во време на глобална криза предизвикана од ковид-19, компанијата работи со полн капацитет. Во компанијата работат 100 лица, а во тек е и конкурс за вработување на уште 50 нови кои ќе бидат ангажирани наскоро.

Минатата година „АТС Гроуп“ инвестираше над три милиони евра во новата современа фабрика за производство на композитни производи наменети за опрема на армијата и полицијата во делот на балистичка заштита и безбедност.