Во близина на литванскиот град Шајауљај се наоѓа рид на кој уште во 2006 година имаше повеќе од 100.000 крстови.
Ридот на крстовите е аџилачко место на кое во средината на 19-иот век бил поставен првиот крст, а подоцна тоа станало традиција. Првиот крст е поставен како споменик на жртвите од Ноемвриското востание од 1831 година кои се и закопани тука, а потоа и на жртвите од Јануарското востание од 1863 година.
Првото повеќебројно поставување крстови се случило во 1956 година кога првите прогонети се вратиле од Сибир. Тие ги врежувале своите страдања и ги оставале на ридот.
На почетокот постоеле околу 100 крста, за до 1961 година бројот да достигне до 5000, по што властите на СССР се обиделе неколку пати да ја уништат оваа локација.
Прво ги уништиле крстовите со машини ама мештаните го обновиле ридот, а потоа било кажано дека ќе бидат отстранети само оние кои немаат уметничка вредност, ама ги отстраниле сите. Властите се обиделе од местото да направат мочуриште и околу него да постават канали за да не може да се пријде, а кога не им успеало, измислиле епидемија, што ни покрај постојаната стража не ги спречило граѓаните секојдневно да го носат својот крст.
Од 1975 година до 1990 година бројот се зголемил од 1200 на 55 000 крстови со различни големини и материјали, за по 15 години да се зголеми двојно. Денес не е познато колку ги има, бидејќи секој може да остави свој крст или статуетка или било што друго кое претставува поврзаност со религијата, ама, за жал, постојат туристи кои оставаат предмети кои го сквернават местото.
Во близина се наоѓа фрањевски манастир кој е изграден по благословите кои ги даде папата Јован Павле Втори во посетата на Ридот на крстовите во 1993 година. Тој тогаш одржа миса пред 100 000 луѓе, а во таа пригода е поставен и негов крст кој се наоѓа во подножјето на ридот пред останатите.
Папата со своето доаѓање го направи Ридот на крстовите „видлив“ за светот, а УНЕСКО оваа локација ја вброи во нематеријалните богатства на Европа, а за Литванците ова свето место преставува и сеќавање на борбата против комунизмот.