Експертите за интернет безбедност предупредуваат за лажни апликации кои се појавиле во продавницата за апликации и содржат опасни вируси, т.н. Тројанци.
Експертите ги советуваат корисниците секогаш да инсталираат апликации на своите мобилни уреди исклучиво преку официјални онлајн продавници, пренесува N1 Словенија.
За корисниците на “Android”, тоа е “Google Play”, додека за корисниците на “Apple”, тоа е “App Store”.
Но, дури и официјалните продавници повеќе не се целосно безбедни од апликации кои содржат малициозен софтвер кој може да ги заобиколи сите безбедносни механизми.
“Google Play”, продавницата за “Android”, изгледа поранлива на опасните апликации.
Неодамна рускиот производител на антивирусен софтвер „Dr. Web“ предупреди за неколку апликации што се појавија во продавницата на “Google Play” и содржат тројанци. Иако “Google” оттогаш ги отстрани злонамерните апликации од својата продавница, милиони корисници веќе ги инсталираа апликациите на своите уреди.
Ако имате инсталирано некоја од нив на вашиот уред, се препорачува да ја избришете.
Избришете ги овие апликации
Меѓу најчесто инсталираните апликации кои содржат тројанци се четири игри. Тие се: „Agent Shooter“, „Rainbow Stretch“, „Rubber Punch 3D“ и „Super Skibydi Killer“.
Кога ги отворате овие апликации, тројанците работат во заднина, трошат ресурси на телефонот и постојано прикажуваат наметливи реклами.
Во некои случаи, апликацијата ја менува својата икона во целосно транспарентна, оставајќи го името празно, што им отежнува на корисниците да ја забележат. Понекогаш малициозниот софтвер ја заменува својата икона со иконата на прелистувачот “Chrome”.
Кога корисникот се обидува да го отвори “Chrome”, тројанецот работи во позадина, без знаење на корисникот.
Друга опасна апликација која крие тројанец е наречена „Android. Joker“. Оваа апликација може да предизвика неочекувани трошоци бидејќи ги претплатува корисниците на различни услуги и истовремено имитира многу постоечки апликации.
„Dr. Web“ предупреди и за некои други апликации кои можат да претставуваат опасност за корисниците, особено оние поврзани со акции и други форми на инвестирање. Меѓу нив се „MoneyMentor“, „FinancialFusion“, „GazEndow Economics“ и „Financial Vault“. Овие апликации се обидуваат да ги измамат корисниците и да ги пренасочат на лажни инвестициски сајтови.
Апликациите кои содржат тројански коњ исто така се “Eternal Maze”, “Jungle Jewels”, “Stellar Secrets”, “Fire Fruits”, “Cowboy’s Frontier”, “Beauty Wallpaper HD” и “Love Emoji Messenger”.
