Директорката на социјалната мрежа Х (поранешен Twitter), Линда Јакарино, потврди дека корисниците на оваа платформа наскоро ќе можат да остваруваат видеоповици.
Јакарино ја најави новата функција на X за време на интервју за CNBC.
„Наскоро ќе можете да остварувате видеоповици без да мора да го откриете вашиот телефонски број на никого на платформата“, рече таа.
Ова е уште еден показател дека Јакарино, заедно со сопственикот на X, Илон Маск, навистина работи на мисија да го претвори X во „апликација за секого“, со долги клипови, опции за плаќање, претплати и многу повеќе.
Оваа информација доаѓа по „шифрирана објава“ на дизајнерката на X, Андреа Конвеј. Таа во својата објава напиша дека „штотуку повикала некого на X“. Иако на почетокот не беше јасно за каков повик станува збор, сега е јасно дека станува збор за видеоповик.
Сепак, сè уште не е јасно како X ќе користи видеоповици за да ја задоволи огромната побарувачка на потрошувачите. Светот на видеоповиците е веќе „преполн“ бидејќи има „играчи“ како Zoom, Microsoft Teams, Google Meet, Apple FaceTime и други. Сепак, Маск и Јакарино се решени да ја трансформираат компанијата и да го гледаат X како нешто многу поголемо од твитовите, нешто што ќе стане центар за медиумска содржина, комуникации и плаќања.
„Додека го ребрендираме X, мора да бидеме отворени и свесни дека тој еволуира во ‘глобален градски плоштад’ поттикнат од слободното изразување, каде што јавноста се собира во реално време. Реалното време е најважно за живоста на X и за интеракцијата на луѓето со него. Сега е сето тоа во еден беспрекорен интерфејс“, рече Јакарино.
Еден од првите нови чекори на X е долготрајно видео. Во мај, компанијата додаде можност за објавување видеа долги до два часа за претплатниците на Twitter Blue. Apple веднаш го прифати ова и ја искористи можноста да ја објави целата прва епизода од својата серија „Silo“. X неодамна почна да им плаќа на креаторите на содржина кои имаат доволно следбеници за да генерираат приходи. Еден корисник тврди дека добил 24.000 долари.
Директорката зборуваше и за можностите за исплата.
„За тоа многу се зборуваше, за плаќања меѓу вас и пријател, меѓу вас и еден од вашите креатори. Се работи за ослободување од Twitter, кој ни овозможи да еволуираме, да го промениме начинот на кој луѓето слушаат, гледаат, се собираат, забавуваат и обавуваат трансакции, сите на една платформа“, заклучи Јакарино.
