Корисниците на канабис имале 14 отсто повеќе болки за време на опоравувањето по операцијата, откриле истражувачите

Луѓето кои користат канабис може да се соочат со поголема болка по операцијата од оние кои не го користат овој опијат. Тие исто така имаат потреба од повеќе лекови против болки, покажала студијата.

Како што пренесува „Дејли мејл“, многу Американци консумираат марихуана за да ја ублажат болката предизвикана од бројни медицински проблеми. Истражувачите од Клиниката во Кливленд ги анализирале нивоата на болка и евиденцијата за употреба на опиоиди на 35.000 пациенти по операцијата.

Меѓу нив имало и 1.600 луѓе кои користеле марихуана најмалку еден месец пред операцијата, но не за хронични болки.

Во Охајо, каде што се наоѓа клиниката, дозволена е употреба на канабис за медицински цели.

Корисниците на канабис имале 14 отсто повеќе болки за време на опоравувањето по операцијата, откриле истражувачите.

Примиле и седум отсто повеќе лекови против болки, иако тоа не било значително повеќе од другата група.

Д-р Елјад Екрами, клинички истражувач, вели дека оваа студија ја нагласува важноста да им се каже на лекарите дали пациентот користи канабис. Тој вели дека пациентите не треба да престанат да го земаат пред операцијата, освен ако тоа не им биде препорачано од нивниот лекар.

Експертите објаснуваат дека канабисот може да доведе до поголема болка по операцијата, бидејќи корисниците можеби нема да можат да го земат во болница, што ќе предизвика поголема болка. Причината може да биде и тоа што канабисот ги прави рецепторите за болка помалку чувствителни, па затоа се потребни повеќе лекови против болки за да се намали чувството на болка.

Оваа студија е првиот голем труд кој го потврдува верувањето на научниците дека употребата на канабис може да предизвика пациентот да трпи поголема болка по операцијата.

Трудот бил претставен на годишниот состанок на Американското здружение на анестезиолози во Њу Орлеанс.