Две дена нема ниту збор за прославите на СДСМ во Штип. А, според фотографиите кои што се шират на социјалните мрежи, станува се појасно и зошто е овој молк. На првата фотографија, до Сашко Николов и Костадин Костадинов, се и Наум Барзов, инаку роднина на Сашко Николов, а на пошироката јавност познат како газда на штипска фабрика, која што на работниците им исплати плата од само два денари во време на корона кризата, вели  Наум Стоилковски, портпарол на ВМРО-ДПМНЕ

-Дали можеби сега се радува на оваа маса затоа што ќе си го спаси бизнисот, со добиениот мандат на Сашко Николов? Со нив е и Мишко Николов, партиски финансиер и сопственик на ресторанот каде што се организира банкетот за прослава на СДСМ вон пропишаното работно време. Истовремено, прашувам дали е точно тоа што во Штип се говори за него дека е главен партнер на оној добитник на огромни тендери во здравството со меил адреса „Жути ет Јаху“, истакна тој.

Потоа, како што можете да видите во видеото, тој покажува и објаснува фотографија.

-На оваа фотографија е Здравко Коцев, познат како неуспешен политичар во Штип, на два пати поразен кандидат за градоначалник од СДСМ. Коцев сега е на платен список како инспектор во МВР. Значи, инспектор кој е присутен во кафеана која што работи вон пропишаното работно време за време на епидемијата корона! Со него на фотографијата е Сафет Али, сега шеф на паркинзи во Штип. Али е познат како човекот кој што ја згрози јавноста кога среде кампањата во 2017 година организираше погреб, опело за тогашниот градоначалник Илчо Захариев, а целата церемонија самиот ја нарече и ја водеше како „Али не се шали“! Николов, Костадинов, но и инспекторот Коцев треба да одговорат, дали и Али како и другите двајца на фотографијата, се испорачувачи на нелегални финансирања и позајмици, но и за други делувања од криминалното подземје на Штип? И дали сите нив заедно, сите четворица во Штип се познати како „Шерифите“? – вели тој.

Стоилковски порача дека вака СДСМ ја прослави победата на избори на кои што сами учествуваа. Со полициски инспектори и луѓе со сомнително делување.

-Сега треба да одговорат дали и колку овие луѓе биле вклучени во корона изборите во Штип. Истовремено, здравствените, но и другите власти кои треба да одржат редот во вонредните околности за време на епидемијата, треба да одговорат зошто не реагираа и зошто се уште не реагираат.  Дали присуството на политичари, бизнисмени, инспектори и луѓе од подземјето ја спречија полициската специјална акција предводена од Мери Проја Продановска и токму заради истите нив изостана и онаа медиумска хистерија за недозволени прослави среде корона? – заклучи тој.