Се формира работна група која ќе треба да соработува со правосудните органи за да се подготви план за ветинг, а од сите раководни позиции и од идни амбасадори ќе се бара да го поминат најстрогиот ветинг преку системот на НАТО сертификатите
Вознемиреност и непредвидливост предизвика последниот случај со приведувањето на дипломат од Министерството за надворешни работи, вели шефот на дипломатијата, Бујар Османи, кој додава дека овој случај ја разнишува и довербата и авторитетот на куќата и затоа досега се преземени неколку итни мерки.
-Не само како обврска кон нашите државни интереси, туку како земја – членка на НАТО, како идни претседавачи со ОБСЕ во 2023 година, ние имаме обврска да воспоставиме непропустлив систем на сертификација и проверка на дипломатскиот кадар со цел да ја вратиме довербата и во институцијата и во државата, вели Османи.
Тој повтори дека на вработениот во МВР работниот однос му е ставен во мирување и истиот е повлечен од неговите задолженија на мисијата на ОБСЕ. Понатаму, вели Османи, почната е постапката за формирање работна група која ќе треба да соработува и со правосудните органи за да се спроведе ветинг.
-Второ, пуштив итна процедура за формирање работна група која треба да изврши првична итна ревизија на состојбите со сертификатите и документацијата со цел да се утврди дали постои одредена иманентна закана за сигурноста и доверливоста на куќата, особено закана која е поврзана со предметниот случај. Трето, работната група ќе добие и задолжение да оствари и меѓуресорска соработка со правосудните служби и службите за безбедност, со цел да се подготви план за вонреден ветинг на дипломатијата; оваа работна група ќе треба да ја оформи и меѓуресорската Комисија која ќе ѝ биде предложена на Владата, која, пак, ќе треба да го спроведе вонредниот ветинг преку процесите на сертификација и дополнителна безбедносна проверка, објави Османи.
Од сите раководни позиции односно директори и раководители на сензитивни позиции, шефот на дипломатијата вели дека ќе побара задолжително да поминат најстрог ветинг преку системот на НАТО сертификат, а истиот принцип ќе биде задолжителен и во пополнувањето на амбасадорските места.
