Делегацијата на Европската Унија во Скопје експресно реагираше на владината одлука петте предлог-закони за коридорите да ги испрати во Собранието со европско знаме. Во одговор на прашање од „Слободен печат“ од Делегацијата велат дека во овој случај не е оправдано ставањето европско знаме и дека побарале дополнителни објаснувања од власта.

„Означувањето на законите со европско знаме има за цел да помогне да се забрза интеграцијата на Северна Македонија во ЕУ и според тоа треба да има за цел усогласување на законодавството со законодавството и стандардите на ЕУ. Во овој случај, предлог-законите се чини дека не се однесуваат на усогласување со таквите стандарди. Ја изразивме нашата загриженост до националните власти и бараме дополнителни појаснувања“, се вели во одговорот од Делегацијата на ЕУ на нашето прашање за коментар на владината одлука, за Слободен печат.

Оттаму потсетуваат дека во последните извештаи на Европската комисија за Северна Македонија, нагласено е дека употребата на брзи процедури треба да се ограничи и да се применува само кога е оправдано за унапредување на реформската агенда на ЕУ.

„Таа не треба да се користи за скратување на јавните консултации или за решавање на процедуралните тешкотии во законодавниот дом“, додаваат од Делегацијата на ЕУ во одговорот.

Владата на денешната седница донесе нови пет предог-закони за коридорите 8 и 10д и ќе ги достави до Собранието со европско знаме, со цел, како што рече вицепремиер Артан Груби, изградбата на коридорите да биде поевтина и побрза.

На денешната прес-конференција во Владата Груби ја повика опозицијата да прекине со блокадите на законските решенија зашто со тоа се ставале во заложништво 150 милиони евра од граѓаните и се загрозувале националните стратегиски проекти поради дневно-политичка агенда.

– Со оглед дека ЕУ го додаде на мапата коридори и Коридорот 8 и со оглед на неговото геостратешко значење, заедно со коридорот 10д, како и поради тоа што долго во јавноста се води дебата, одлучивме законите да се предложат со европско знаме. Пратениците да се откажат од блокади и да не ги поскапуваат автопатиштата за над 150 милиони евра и да не ги загрозуваат националните стратегиски проекти поради политичка агенда, рече Груби.