Пареото, ткаенина која практично може да се врзе на различни начини, е омилено летно парче.

Парео е квадратна или правоаголна памучна ткаенина, која можеме да ја набавиме во многу продавници, па дури и на тезги. Многу е практично и може да се носи на различни начини. Ако научите како да го врзувате, од него можете да направите здолниште, блуза или фустан.

Ова модно парче потекнува од Азија. Пареото е карактеристично за регионот на Тахити и Хаваи, а многу сличниот саронг (ист е како пареото, само што е поголемо парче ткаенина) се носи во Индија, Малезија и Филипините.

Пареото е достапно во различни бои и дезени.

Можете да го врзете околу колковите и да го претворите во здолниште кое можете да го носите на плажа со горен дел од костим за капење. Можете да го носите и низ град, со блуза или маица.

Ако го врзете пареото во јазол на предниот дел на градите, ќе добиете пријатен летен фустан. Можете исто така да направите фустан со врзување на пареото во јазол зад вратот.

А ако го прекрстите пареото на градите и го врзете на грбот, ќе добиете атрактивен топ.