Околу илјада млади девојки од Македонија последнава година побарале да си ја вратат невиноста со хируршка реконструкција на хименот. Операцијата хименопластика е светски тренд кој во последно време го следи и Македонија.

Расте бројот на Македонки кои сакаат да бидат невини и имаат интерес да се омажат како девици.

Ако некогаш телесните исеченици и прскањето на чаршафот со крв или со некаква црвена течност биле трикови со кои лажната девица се обидувала да го измами својот маж првата брачна ноќ, денес жените кои сакаат да бидат девици, а тешко им паѓа сексуалната апстиненција, невиноста ја враќаат за неколку стотици евра, со хируршки зафат.

Хименопластиката кај нас ја прават и гинеколози и пластични хирурзи и тоа во нивните приватни клиники.

Операцијата за обновување на хименот спаѓа во пластичната хирургија. Хименопластиката се вбројува во полесни операции, се изведува со локална анестезија и трае од триесет до шеесет минути.

– Со првиот сексуален контакт доаѓа до пукање на хименот на повеќе делови. Остатоците од хименот остануваат од страните, во внатрешноста на вагината. Парченцата се составуваат, се шијат со посебен конец од животинско потекло, кој во организмот се распаѓа. Со овој зафат се добива нов химен – објаснува лекар од една приватна гинеколошка ординација.

Хирушката интервенција за враќање на невиноста чини од 500 до 700 евра.

Тоа е особено изразено во западниот дел од земјава, најчесто во Тетово, Гостивар, Кичево, а се разбира бројката е голема и во Скопје. Исто така, има и пациенти од соседните земји кои доаѓаат на нашите клиники да ја направат оваа „реконструкција“.

Старосната граница може да биде варијабилна и нема никаква поврзаност со тоа дали пациентката има родено или не. Доколку станува збор за малолетно лице, како и за секоја интервенција, неопходна е согласност од двајцата родители.

Извор: Скопјеинфо