До 19 и 30 часот вечерва може да се поднесуваат приговори за сумирањето и утврдувањето на резултатите од предвремените парламентарни избори. До 13:30 часот денеска нема поднесено други приговори така што бројката на приговори е иста како до синоќа-82.

Портпаролот на ДИК, Адмир Шабани, изјави дека до 13:30 часот денеска ниту еден подносител на кандидатска листа не поднел приговори за сумирање и утврдување на резултатите од изборите. За 82-та приговори кои се пристигнати до синоќа, а и за оние што треба да пристигнат денеска, ДИК на седница треба да расправа во рок од 72 часа од нивното поднесување.

Најголем број од поднесените 82 приговори одосно 74 се од Алијанса за Албанците, но има и два од ВМРО-ДПМНЕ кои се однесуваат на сумирањето на резултатите од гласањето.

Во 21 часот синоќа истече рокот за поднесување приговори за постапката на гласање.

Роковите за приговори почнаа да течат завчера вечер, откако ДИК ги објави неофицијалните конечни резултати од изборите.

По завршувањето на роковите за поднесување приговори, ДИК ќе закаже седница на која јавно ќе ги разгледа и ќе одлучува, соопшти вчера претседателот на ДИК, Оливер Деркоски.