Тоа што го кажа американската амбасадорка Анџела Прајс Агелер, тоа во изминатите месеци сме го изјавувале сите ние кои сме сериозно загрижени за случувањата во нашата држава на тема борба против корупцијата и организираниот криминал, изјави вечерва Славица Грковска, вицепремиерка задолжена за спроведување политики за добро владеење.

-Јас на тоа би гледала повеќе двонасочно. Од една страна како поддршка и помош за разрешување на крупни коруптивни случаи, што е една од забелешките, а од друга страна и како критика и за моменталната состојба за степенот на корупција во нашата држава, рече Грковска во вечерашното интервју за „Топ тема“ на телевизија „Телма“.

Таа нагласи дека целокупната борба во државата, во делот на корупцијата, е обврска на сите.

-Јас не нè изземам нас како Влада од оваа ситуација, ниту пак изземам од одговорност некоја од институциите. Затоа што секоја од институциите има своја улога во борбата против корупцијата и организираниот криминал. Меѓутоа, важно е да се разгледуваат поединечните капацитети, поединечните успеси и да се види која е најслабата алка и од која причина добиваме се поотворени оценки и дојдовме до степен да добиваме вакви отворени и без ракавици пораки од нашите меѓународни пријатели, вели Грковска.

За неа, најавената американска помош во борбата со корупцијата и организираниот криминал е добредојдена.

Вицепремиерката смета дека корупцијата не е рапидно порасната последните два месеци туку дека се работи за акумулирана состојба, но оти во минатото малку се говорело на таа тема за разлика од сега.