Речиси сите матични лекари од Куманово, се приклучија на предупредувачкиот штрајк, кој го организираат на ниво на државата, соопшти денеска, координаторот на Здружението на матични лекари од Куманово, д-р Фатмир Асани.

Тие бараат зголемување на капитацијата, бидејќи, велат неиздржливо е да се работи во услови на криза и зголемени цени. Дел од лекарите, особено со помал број пациенти, се на работ на затворање на ординациите.

Денеска матичните лекари не го користеа „Мој термин“, а прегледуваа само итни пациенти.

– Во Куманово има околу 20-тина ординации кои не можат да го платат зголемувањето на минималната плата за медицинските сестри, сè е покачено, електрична енергија, горива, материјал за работа, храна. Ние
стоиме во место. Има ординации во помали градови кои се пред затворање, изјави д-р Асани.

Во Куманово има околу 100 ординации. Лекарите им се извинија на пациентите, укажувајќи дека ова е предупредувачки протест преку кој бараат зголемување на бодот кој што моментно изнесува 63 денари и е од
2018 година. Лекарите бараат и промена на, како што велат, застарени правилници, намалувања на казни од Фондот.

Матичните лекари од Куманово велат дека биле во првите редови во борба против коронавирусот и дека е важно да им се излезе во пресрет во однос на сегашните барања.