Ова е преседан, но вие така и почнавте со владеење на сила и со преседани, изјави Олга Лозановска, пратеничка од ВМРО-ДПМНЕ на денешната собраниска комисија на која се разговара за разрешување пратеник од позицијата член на Комисијата за избори и менувања.

Лозановска додаде дека лажни се изјавите на владејачкото мнозинство дека со разрешување на Зендели ќе се испочитува волјата на граѓаните, додвајќи дека сегашниот премиер е назначен без да се испочитува волјата на народот и да се избере на парламентарни избори.

Знаете дека во 2016та година па спротивно на волјата на граѓаните формиравте влада. Премиерот го избра ли народот? Не, рече таа.

Според Лозановска наместо да дискутираат за четирите кризи кои што ги создаде владата на СДСМ, пратениците дискутираат за разрешување на Зендели, се со цел да си ги реализираат коалициските договори.

Имаме четири кризи и наместо тука да разговараме за тоа како да им помогнеме на граѓаните, како полесно да ги пребродат овие кризни состојби за кои вие сте виновни затоа што не знаете да се справите со здравствената криза, вие ја направивте енергетската, економската криза. И значи ние за тоа дебатираме, ние тука дискутираме за промена на еден член од комисијата. Зошто? За да се реализираат вашите партиски коалициски и владини договори, потенцираше таа.

Наместо уставните судии да се изберат со консензус вие сакате вашата иднина и иднината на вашата влада да ја осигурате. Со вакво судство дали знаете кога ние ќе добиеме датум за преговори за ЕУ? Никогаш, заклучи Лозановска.