Обединетата Македонска Дијаспора испрати соопштение до јавноста по повод францускиот предлог и даде силна поддршка до македонскиот народ кој протестира.

Соопштението ви го пренесуваме интегрално во продолжение:

„Обединетата Македонска Дијаспора (ОМД), водечкиот глас на Македонците надвор од Македонија, силно ги поддржува ставовите на мнозинството на граѓаните во Република Македонија и бара од Владата на Ковачевски веднаш да го одбие францускиот предлог кој е тројански коњ за бугарските националистички барања и апетити.

Францускиот предлог вметнува билатерален спор во преговорите за влез во ЕУ. Македонија не смее да дозволи Бугарија да успее во нивното историско негирање и ревизионизам.

Истовремено, остро ја осудуваме изјавата на Бујар Османи дека доколку Македонија не го прифати францускиот предлог ќе има меѓуетнички тензии – заплашувањето на народот на никому не му е од корист. ОМД го потсетува Османи дека Македонија е НАТО членка и нејзините територијални граници се загарантирани со потпишувањето на договорот за стратешко партнерство помеѓу САД и Македонија во мај 2008 година.

Францускиот предлог не дава никакви гаранции дека македонскиот јазик е чист и дека ќе стане официјален јазик на Европската Унија кога Македонија ќе стане полноправна земја членка. Предлогот само нотира дека ЕУ ги забележа соодветните еднострани декларации на Бугарија и Македонија за македонскиот јазик – тука нема погрешно протолкување – ова не е изјава на признавање.

Со многукратното спомнување на членот 12 од Договорот за Добрососедство со Бугарија, францускиот предлог ги вметнува бугарските услови за идентитетот, јазикот и историјата кој се изгласани со резолуција од мнозинството на Бугарското Собрание. Во истото тоа собрание на земја членка на Европската Унија, на 24ти јуни, триесетина бугарски пратеници гордо истакнуваа натписи со “Македонија е Бугарија.”

Францускиот предлог ја менува преговарачката рамка и додава дополнителни услови. За Македонија да ги започне преговорите за влез во ЕУ се додава условот дека мора Бугарите, кој според последниот попис во Македонија се 3,504 на број (еднакво на статистичка грешка), да се додадат во Уставот на Република Македонија, без било каков реципроцитет. Со овој потег, Владата на Македонија ги загрозува правата на Македонците во Бугарија кој немаат никакви права во таканаречената европска држава Бугарија.

Францускиот предлог е кристално јасен. Човек не треба да е експерт за меѓународно право за да сфати дека Македонија пак мора да плати висока цена за да ги отпочне пристапните преговори, што не е никаква гаранција за идно членство во ЕУ.

Со прифаќање на францускиот предлог, Македонија ќе си отвори дополнителни проблеми. Најголемиот проблем е тоа што Бугарија, како и Грција со неуставниот Преспански Договор, ќе ги диктираат условите, идентитетот, јазикот, и историјата на македонскиот народ и нација.

Упатуваме и јасна порака до опозицијата: да не ви се случи реприза на 2018 година кога 8 пратеници гласаа за промена на уставното име на Република Македонија. Ако Владата мисли да го усвои францускиот предлог, веднаш излегувајте од Собранието за да се оневозможат било какви уставни промени за што е потребно 2/3 мнозинство (80 пратеници).

Народот го кажа своето со овие масовни протести. Да се почитува гласот на народот, да се почитуваат комитите, партизаните и сите оние кои имаат дадено жртва за нашата Македонија. Доста е од компромиси, потчинетост и самонепочитување. Време е Македонија да се посвети на зајакнување на македонштината. “