Во процесот на разговори со Синдикатот за образование, наука и култура (СОНК), министерот за образование и наука Јетон Шаќири вели дека имале една цел, а тоа се подобри услови за наставниците. Како социјални партнери, вели Шаќири, не треба да застанеме само на минималната плата, туку да се разгледаат и други начини за мотивација и подобрување на образовниот процес.
За тоа што СОНК се повикува на рок од 20 дена за решавање на проблемот, Шаќири во емисијата „Вин-Вин“ на телевизија Телма рече дека тоа е по Законот за мирно решавање на одредени конфликти, откако не бил прифатен последниот предлог.
– Ние побаравме од Министерството за труд и социјална политика да одбере помирувач за што го имаат известено и СОНК, изјави Шаќири.
Прашан зошто ова не е направено порано, Шаќири рече дека верувал оти ќе биде постигнат позитивен договор.
– Имавме една цел, а тоа се подобри услови за наставниците. Ќе треба да ги разгледаме нашите позиции. Можеби и од страна на МОН имаме одредени грешки во чекорите, но исто така, и од страната на СОНК, рече Шаќири.
Во преговорите со СОНК, Шаќири посочи дека биле отвориле повеќе дискусии – од методологијата за пресметка на плата во колективниот договор до различните начини за мотивација на наставниците.
