Апостол Симовски, директорот на Заводот за статистика, кој треба до година да го спроведе националниот попис, одговарајќи на новинарско прашање, вели дека е можно одложување на оваа операција, која инаку е планирана да се изведе во април следната година.
Како причина се наведува тоа што се уште не може да се изнајде консензус помеѓу владеачкото мнозинство и опозицијата за да биде изгласан законот а зацртаниот рок одамна е одминат.
„Дали тоа ќе биде во април или нешто подоцна не знам, но ќе мора да го спроведеме. Се надевам дека ќе има попис во најскоро време, зашто тоа е нешто што е во интерес на сите граѓани на државата, а не во интерес на која било политичка опција во Парламентот“, рече Симовски.
Симовски ги повика пратениците да најдат разбирање и време за да се посветат на што поскоро донесување на законот за спроведување на пописот, бидејќи оваа операција, како што вели тој, дефинитивно ни е нужно потребена и мора да се спроведе бидејќи е од исклучително значење за државата и за сите граѓани.
„Ова е исклучително важна операција за целата држава и за сите граѓани во неа, така што се надевам дека парламентарците ќе најдат разбирање и време да се посветат на ова прашање и законот да се донесе што е можно побрзо. Се разбира нема пропаѓање, затоа што може да има само одложување на пописот“, смета Симовски.
