Со изведување докази, предложени од одбраната, во Кривичниот суд во Скопје продолжува судењето за уривањето на станбено-деловниот комплекс „Космос“ на бизнисменот Фијат Цаноски.

Станува збор за околу стотина материјални докази, меѓу кои и измени и дополнувања на ДУП за Керамидница во Општина Гази Баба, планска документација и извештаи.

Во случајот „ТНТ“ обвинети се поранешниот премиер Никола Груевски, кој е во бегство во Унгарија, екс министерот за транспорт и врски Миле Јанакиески, спроведен од притвор, како и поранешниот градоначалник на Гази Баба, Тони Трајковски.

Процесот го води судијата Огнен Ставрев, а застапник на обвинението е Бурим Рустеми од СЈО.

Доказите ги презентира обвинетиот Тони Трајковски.

Оштетениот Фијат Цаноски на претходно рочиште најави дека ќе бара отштета во висина од 40 милиони евра, колку што ја цени направената штета.