Без проблем започна новата учебна година во кавадаречките училишта. Првачињата беа примени во образовниот процес со пригодна културно-уметничка програма, во изведба на постари ученици.

– Се надевам дека ова ќе биде најубавиот дел од вашето детство. Можноста за учење претставува богатство. Учете многу, не за еден ден, туку учете вредно, за да бидете добро едуцирани и образовани личности. Со добро знаење, добро срце, сторете нешто добро за светот, им порача Илинка Бакева, в.д директор во Основното општинско училиште “Страшо Пинџур”.

Добредојде во светот на образованието, бројките и буквите, во светот на училишната магија, посака и Блаже Велков, директор во училиштето “Тошо Велков Пепето”. На првоодделенците, тој им порача исто така, во училишните клупи да се чувствуваат како дома, а еден ден од таму кон новите животни предизвици, да заминат како културни, паметни и насмеани личности.