Ова не е прв ваков трагичен настан во ЗОО Скопје, сум сведочел на низа на ситуации кои секогаш завршиле лошо по животните во текот на изминатите години. И тврдам дека зад овој случај, со трите угинати пржевалски коњи, стојат лица кои се вработени во институцијата – за ,,Фокус” вели новинарот Зоран Василевски, познат во јавноста како Зоки Фаци, кој е дипломиран ветеринар, а во минатото работеше во дневен весник како новинар кој покриваше настани од областа на ветерината и зоологијата.
Ова свое тврдење тој го поткрепува со свои сведочења на настани за кои пишувал во минатото, а посебно го потенцира случајот од почетокот на август 2005 година, кога во зоолошката на свиреп начин беа убиени првин срндакот, а потоа и две срни. Невините животни, како што тогаш покажа истрагата, биле убиени со стап, а потоа биле фрлени кај мечките.
Тогашната директорка на зоолошката, Верица Ефремова, настанот го пријавила во МВР, но повеќе од две недели го криела од јавност, по што во јавноста следеа бурни реакции и се бараше нејзина оставка.
По настанот со срните, Град Скопје ангажираше четворица дополнителни чувари да ги чуваат животните, а вистината за убивањето на срните никогаш не се откри. Дали како што се шпекулираше, зад масакрот стојат незадоволни вработени, или пак посетители – монструми, остана непознато за јавноста.
-Уште кога објавив за случајот со масакрот со срните, пред околу 18 години, добив анонимен телефонски повик од вработен во зоолошката, кој ми кажа дека тоа е дело сторено од вработени, поради револт кон тогашниот менаџмент во институцијата. Дека намерно е сторено делото со голема суровост, за да одекне во јавност и да привлече внимание кон ЗОО Скопје.
Потоа, се случуваа уште многу немили настани, во кои за жал, жртви беа животните. Голем број на животни беа пуштени да побегнат од зоолошката, сигурно јавноста се сеќава на случајот со муфлоните, јас редовно известував и ги следев случките, и поради моја реакција и иницијатива, беа сменети тројца директори во тоа време- вели Василевски.
Целиот текст прочитајте го ТУКА
