Екипите на зимската служба на Град Скопје изминатово деноноќие ги чистеа од снег градските сообраќајници, пешачките патеки и јавните површини. Од 17 до 7 часот утрово се фрлени 288 тони индустриска сол.
Град Скопје информира дека на терен се интервенира со механизацијата на јавното претпријатие „Улици и патишта“, со 16 возила на зимска служба и три грејдери, а на располагање е и механизацијата на преостанатите јавни градски претпријатија.
Екипите на ЈП „Паркови и зеленило“ ги расчистувале тротоарите на булеварите „Илинден“, „Митрополит Тедосиј Гологанов“,„Видое Смилевски-Бато“, „Борис Трајковски“, улиците „Втора македонска бригада“, „Адолф Циборовски“, кружниот тек во населбата Топанско Поле, просторот пред Собрание на Република Македонија, патеките низ Градскиот парк, паркот „Македонија“ и мостот „Гоце Делчев“.
Екипите на ЈП „Комунална хигиена“ интервенирале на повеќе локации со 125 работници и механизација (четири трактора со специјални четки за снег, еден трактор со специјални ножеви за снег, два мотокултиватора, како и две патарки за расфрлање сол). Нивните екипи работеле на расчистување на јавните површини во централното градско подрачје, каде се чистеле плоштадите, мостовите и Старата скопска чаршија. Овие екипи ги расчистувале пешачките и велосипедските патеки по булеварите „Партизански одреди“, „Илинден“, „ВМРО“, „11-ти Октомври“, „Крсте Мисирков“, „Цветан Димов“, „Христијан Тодоровски-Карпош“, „Александар Македонски“, како и улиците „Димитрија Чуповски“, „Филип Втори“ и „Мајка Тереза“.
Екипите на ЈП „Водовод и канализација“ ги чистат сливниците.
Градските власти апелираат возачите да возат внимателно и да се придржуваат на условите на коловозите, а сите стопански субјекти и граѓани да ги почитуваат законските обврски и да го расчистуваат снегот и мразот од пристапите до нивните деловни, односно станбени објекти.
