„Премиерот Оливер Спасовски да ја разреши министерка за труд и социјална политика, Рашела Мизрахи“, побара денеска министерот за надворешни работи Никола Димитров.
Реакцијата на Димитров доаѓа откако министерката Мизрахи во петокот во МТСП пред да одржи прес-конференција, ја отстрани таблата со „Република Северна Македонија“ и постави нова со Република Македонија.
Димитров кажа дека со ваквото однесување на Мизрахи се крши Уставот, а Грција веднаш во петокот испратила вербална нота во Министерството за надворешни работи.
-Доколку веднаш своето однесување не го врати на линија и во рамките на Уставот, му сугерирам на премиерот Оливер Спасовски да предложи нејзино разрешување до Собранието. Укажувам дека во нејзиното делување има и елементи што можат да повлечат кривична одговорност по член 353 и член 390 од Кривичниот закон, но, тоа е делокруг на работа на други државни органи, рече Димитров.