Мајк Тајсон изминатите месеци напорно работеше со цел подготвен да го дочека своето враќање во рингот. На чекањето денеска му дојде крајот.
Легендарниот американски боксер во септември ќе има егзибициски меч, а по вистинското „лицитирање“ со имиња за можниот противник, сега е познато дека ќе боксува против Рој Џоунс Џуниор.
Тајсон кој има 54 години и три години помладиот Рој Џоунс денеска потпишаа договори за борба која ќе трае осум рунди, а се чини дека „Челичниот Мајк“ при потписот беше под дејство на марихуана.
Американските медиуми пренесуваат дека борбата ќе се одржи во „Дигнити Хелт Спортс Парк“ во Калифорнија. Боксерите нема да носат заштита за главите, но ракавиците ќе им бидат поголеми од вообичаените.
Џоунс се нема натпреварувано во тешка категорија од 2004 година кога го победи Антонио Тарвер, по што се префрли во крузер верзијата. Многумина сметаа дека Мајк Тајсон повторно ќе се бори со Евандер Холифилд и така ќе ја комплетира трилогијата, но тој меч ќе мора да почека уште некое време.
