Ова зад мене е она што е останато од „Урбан Парк“. Ова место требаше да биде се она што треба да претставува општина Центар. Модерно место кое ќе биде собиралиште на сите генерации луѓе, ова на денешна прес конференција го истакна Сегеј Попов од ВМРО-ДПМНЕ.

-Наместо тоа, Центарци се сведоци на негрижата на Општината. Оваа локација од едно културно, средено, зелено катче за одмор и рекреација во овој момент е претворено во едно од најочајните и најгрди места во градот. Граѓаните со месеци се жалат на неподносливата миризба, импровизираните кампови за живеење, искршени клупи, немањето канти за отпадоци и на депониите со ѓубре кои се потенцијална опасност по здравјето на граѓаните. Во последно време Центарци се сведоци и на чување на добиток на овој простор, истакна Попов.

Тој додава дека градоначалникот Богдановиќ во предизборниот период ветуваше дека ќе се грижи за зеленилото низ Центар и им ветуваше на Центарци паркови и чиста, здрава животна средина. Не само што не се прави тоа, туку се остава на времето да го уништи и она што претходниците го направиле.

-Шест месеци откако ја имаат локалната власт во Центар, покажуваат елементарна негрижа. Почитувани, Свесни сме дека луѓето кои живеат во овие импровизирани кампови се од најтешките социјални категории. СДСМ мора да ги исполнат предизборните ветувања за обезбедување на пристојни живеалишта за овие луѓе. Нивното здравје и здравјето на граѓаните кои живеат во близина на овој простор е загрозено. Оваа ситуација не може и не смее да продолжи до недоглед. Како доаѓа летото така секој кој поминува низ овој простор ќе биде подложен на потенцијална зараза. Граѓаните имаат право на здрава животна средина. Центарци заслужуваат модерна и урбана општина, вели Попов.