Рускиот претседател Владимир Путин денеска ги повика граѓаните да ја покажат својата љубов кон татковината, неколку часа пред почетокот на парламентарните избори.

Како што пренесуваат странските агенции, на главните противници на Кремљ не им е дозволено да учествуваат на овие избори кои ќе се одржат и на украинска територија, и покрај противењето на Киев.

„Јас сметам на вашето граѓанско чувство за одговорност, претпазливост и љубов кон татковината и дека се грижите за изборот на претставници кои ќе работат за доброто и за нашата сакана Русија“, рече Путин во видео пораката објавена на веб – страницата на Кремљ.

Путин ја испрати пораката од изолација, бидејќи во неговата околина беа идентификувани десетина лица заразени со коронавирус. – Затоа, тој може да гласа по електронски пат, изјави портпаролот на Кремљ, Дмитриј Песков.

Парламентарните, регионалните и локалните избори започнуваат за неколку часа и ќе траат три дена со цел да се намали ризикот од зараза со коронавирус.

Резултатите се очекуваат во недела по 20 часот по средноевропско време.

На главните противници на Путин не им е дозволено да учествуваат на изборите.

Речиси 180 милиони Руси имаат право на глас, кои бираат 450 пратеници во Долниот дом на Парламентот, Думата.