Од Обвинителството на Бугарија на денешната прес-конференција истакнаа дека во автобусот се пронајдени тела на 44 жртви од автобуската несреќа откако се запали македонски автобус на автопатот „Струма“.

Сијка Милева истакнаа дека при посетата на преживеаните во болница разговарале со дел од нив.

Таа информира дека се сретнала со преживеаниот маж кој и раскажал како го скршил стаклото на автобусот и рекол дека спасил осум лица, а не седум.

– Ние пронајдовме 44 трупа, а тој категорично изјави дека се спасени осум лица. Јас му реков вие сте седум во болницата. И тој категорично ми рече не, ние се спасивме осум лица. Во текот на истрагата, беа пронајдени 44 трупа. Според податоците со кои располагаме, патувале 52 лица, ние пронајдовме 44 тела, а се хоспитализирани седум лица – четворица мажи и три жени. Останува големата загатка, каде е осмото лице. Работиме на таа верзија, не сакаме да шириме дезинформации, може да се работи и за лошо сеќавање на сведокот, истакна Милева.

Таа додаде дека сведокот потоа бил испрашан од истражители во присуство на преведувач и тој повторно категорично тврдел дека се спасиле осум луѓе.

– Јас бев на местото на инцидентот и ги видов јагленисаните трупови, глетката беше ужасна, потешка беше ситуацијата кога заедно со главниот обвинител на Северна Македонија и обвинителката за организиран криминал и корупција ја посетивме болницата „Пирогов“ каде беа сместени седум од повредените. Истите беа во добра физичка состојба, но психички беа во многу тешка состојба. Секој беше во одделна соба во одлични услови и за нив се грижат најдобрите лекари во земјата, рече Милева.

Бидејќи во автобусот биле пронајдени 44 тела, нејасно е што се случило и каде се наоѓа уште едно лице. Несовпаѓање има и во листата на патници.

Ќе се испитуваат повеќе сценарија за оваа ситуација, меѓу кои и дали на паузата која била направена 20-тина минути пред несреќата, дошло до промена кај патниците со некакво префрлање во автобусите.

Можно е тој да ја напуштил границата со друго возило, друг автобус, а тоа треба да се провери.