Од затворен воздушен простор до замрзнати средства, западните земји најавија се построги економски санкции против Владимир Путин, негови роднини и блискиот круг – и врз руската економија.
Еве преглед:
Повеќе од која било друга област, Западот го таргетира финансискиот сектор за да го ограничи капацитетот на Русија да ја финансира војната.
Во последниот пример, Лондон одлучи да ги замрзне средствата на сите руски банки во Британија. Во уште еден голем удар за рускиот финансиски систем, главните банки во земјата се исклучени од системот за пораки SWIFT, кој им овозможува на банките да комуницираат брзо и безбедно за трансакциите.
САД и Европската унија отидоа уште подалеку со директно таргетирање на руската централна банка, со забрана од вчера за сите трансакции со банката. Со санкцијата ефективно се замрзнуваат средствата што ги поседува централната банка во САД, ограничувајќи ја нејзината способност да ги користи големите девизни резерви за купување рубљи и поддршка на вредноста на својата валута.
Слична забрана најавија и Канада и Јапонија.
Веќе се чувствуваат санкциите кон рускиот финансиски сектор.
Имено, има драматичен пад на вредноста на рубљата, што ја принуди руската централна банка речиси да ја удвои основната каматна стапка и се заканува да ја банкротира европската подружница на Сбербанк, најголемиот руски кредитор.
Авионскиот сектор беше еден од првите кои беа погодени од економските последици од украинскиот конфликт. На рускиот авиопревозник „Аерофлот“ му е забрането влегување во воздушниот простор на целата Европска унија, Велика Британија и Канада, принудувајќи го да ги прекине летовите до овие дестинации. Како одмазда, Русија им забрани на авиокомпаниите од истите тие земји да летаат над нејзина територија.
Целата руска воздухопловна индустрија е на мета. ЕУ и Канада го забранија извозот на авиони, делови и опрема од воздухопловната и вселенската индустрија во Русија.
Не е поштеден ниту поморскиот транспорт.
Британија ги затвори сите свои пристаништа за бродови што пловат под руско знаме и за оние што се изнајмени или во сопственост на Руси. Минатата сабота Франција пресретна руски товарен брод на банката ПСБ, што беше цел на европските санкции.
Шведскиот производител на автомобили и камиони Volvo Group вчера објави дека ќе ги прекине испораките во Русија и ќе го запре производството во својата руска фабрика.
Најсимболичната одлука во овој клучен сектор дојде од Германија. Берлин минатиот вторник го запре процесот на сертификација за гасоводот Северен поток-2, клучен канал дизајниран да ја зголеми испораката на руски гас во Германија.
Рускиот гасен гигант Газпром е блокиран да собира средства на западните финансиски пазари.
Директното напаѓање на рускиот енергетски сектор е покомплицирано за западните држави, особено за Европејците. Русија е најголемиот светски производител на гас и втор по големина производител на нафта.
Минатиот петок, Јапонија објави санкции за извоз на полупроводници и други предмети на „организации поврзани со руската војска“, без да даде дополнителни детали. Ова е важен чекор: Јапонија, заедно со Јужна Кореја и Тајван, е еден од главните производители на овие електронски компоненти, кои се неопходни за широк спектар на индустриски производи.
САД најавија ограничувања за руската употреба на нејзините технологии во различни области, вклучувајќи процесори и чипови произведени од врвните добавувачи Nvidia, Intel и Qualcomm.
Европските земји размислуваат за слични санкции.
Ова ќе го блокира рускиот пристап до британската компанија АРМ, што доминира на европскиот пазар за полупроводници, клучен елемент во производството на процесори.
Неколку руски личности беа цел на европски и американски санкции по руската анексија на Крим во 2014 година. Списокот сега е проширен за да вклучи повеќе руски носители на одлуки. Главните меѓу нив се премиерот Михаил Мишустин, министерот за надворешни работи Сергеј Лавров и самиот претседател Владимир Путин.
