Власта се оградува од проблемите меѓу Град Скопје и приватните превозници. Од извршната власт велат дека надлежностите за јавниот превоз се на Град Скопје. Со ова , Владата навестува дека ова нема да биде една од ситуациите слични на оние во минатото, кога од „Илинденска“ се издвојуваа стотици илјади евра за подмирување на општинските долгови.

„Локалната власт е таа што треба да работи за граѓаните. Согласно Законот за Град Скопје, регулирањето и организирањето на јавниот градски и приградски превоз на патници е во целосна и единствена надлежност на Град Скопје. Оттаму, сите барања од превозниците треба да се упатат пред се до градските власти во Скопје, кои пак веднаш и одговорно треба да обезбедат мерки за надминување на ситуацијата“, наведуваат од Владата.

Но, на повидок не е можен договор меѓу Град Скопје и приватните превозници. Арсовска во интервју за „Телма“ рече дека не преговара со луѓе кои уценуваат и навредуваат и кои го прават ова, како што рече, бидејќи вистината не е на нивна страна.

Приватните превозници на „Слобода превоз“ и „Макекспрес“ рекоа дека веќе ангажирале адвокати и парите ќе ги бараат по легален пат. Во петок им се враќаат на протестите и блокирањето на патиштата, а деталите за тоа кога ќе почне протестот, со колку автобуси ќе ги блокираат патиштата, кои делови од главниот град ќе бидат блокирани и колку ќе трае протестот, ќе бидат соопштени утре на прес- конференција. Од сета оваа создадена конфузија трпат граѓаните кои во последните неколку дена наидоа на потешкотии да ги извршуваат секојдневните обврски навреме.