Грција денеска испраќа втор спасувачки тим во Турција за дополнително да помогне во спасувачката акција по силниот земјотрес од понеделникот, објавија грчките медиуми.
Според истите информации, од Солун заминува тим од 15 пожарникари од специјалната спасувачка единица со едно куче спасувач и две возила, заедно со инженер од противпожарната служба и три лекари и спасувачи од Брзата помош.
Во понеделникот попладнето, само неколку часа по земјотресот, од Атина замина првиот тим со 21 пожарникар од специјалната спасувачка единица со две кучиња спасувачи и едно специјално возило, инженер од противпожарната служба, пет лекари и спасувачи од Брза помош и претседателот на Организација за планирање и заштита од земјотреси.
