Европратениците одговорни за односите со Македонија во Европскиот Парламент бараат кредибилна, транспарентна и објективна изборна кампања без дезинформации и заплашувања.
„На 15 јули, народот на Македонија ќе го искористи своето политичко право да одлучи кој ќе владее со државата во следните четири години, водејќи ја низ клучните фази на макотрпните преговори со ЕУ“, изјави известувачот за Македонија, Илхан Ќучук.
Неговата порака пред изборите во Македонија, заедно со претседателот и потпретседателката на Мешовитиот парламентарен комитет, Андреас Шнајдер и Марион Валсман, е дека овие избори ќе бидат тест за политичката зрелост на земјата.
Со оглед на здравствената криза, европратениците бараат од сите политички чинители да се однесуваат одговорно.
„Бараме од властите да обезбедат фер изборен процес и соодветни заштитни здравствени мерки“, пишуваат европратениците.
„Преку инклузивност, толерантност и позитивна дипломатија, Македонија покажа дека е посветена да ги надмине внатрешните и надворешните поделби, поставувајќи пример за целото соседство. Продолжувањето на меѓупартискиот дијалог после изборите е од најголема важност. Најновата членка на НАТО има потреба од политичка извесност за да продолжи на патот на демократската консолидација и процесот на трансформација“, е пораката на Европарламентот две недели пред парламентарните избори.
По изборите, потсетуваат пратениците, потребни ќе бидат целосно функционални институции, како и посветена опозиција за да ја водат државата низ економската криза пост-ковид, како и исполнувањето на ЕУ реформите.
