Доцна по полноќ, жителите на Центар ги вознемири звук на аларм за пожар кој околу 12 часот и 45 минути одекнувал од просторот и околината на Клиниката за инфективни болести и фебрилни состојби во Скопје, во склоп на Клиничкиот центар ,,Мајка Тереза” во Скопје.

Жители од околните станбени згради во редакцијата на ,,Слободен печат” испратија видео материјал од кој се слушаат звуци на аларм за пожар, но не е забележан пламен. Очевидци тврдеа дека медицински персонал во паника трчал во околината на зградата незнаејќи за што се работи откако се активирал алармот.

Директорката на Инфективната Клиника, доктор Милена Стевановиќ за „Слободен печат“ вели дека алармот за пожар се активирал на клиниката затоа што некој од вработените лица на клиниката запалил цигара во внатрешноста на болницата. За ваквото поведение, ќе следуваат санкции и казни, уверува Стевановиќ.