Македонскиот премиер Димитар Ковачевски објави фотографија од средба со американскиот државен секретар Ентони Блинкен и бугарскиот премиер Кирил Петков. Фотографијата е направена за време на говорот на американскиот потпретседател Камала Харис на конференцијата за безбедност во Минхен. Неколку часа подоцна, премиерот на Бугарија, Кирил Петков ја објави истата фотографија со Блинкен на својот Фејсбук профил, но го исече Ковачевски, јави БГНЕС.

„Борбата против корумпираните зависи и ќе се случи главно самостојно, но во оваа битка се вклучени и нашите партнери. Елиминирањето на корупцијата е врвен приоритет за целата демократска заедница и безбедносните служби. Ќе работиме заедно за да се справиме со овој проблем! Ако успееме да го направиме тоа, веднаш ќе следат инвестиции и нови високо платени работни места!“, напиша Петков како наслов на својата објава на социјалната мрежа, на која покрај исечената фотографија со Блинкен, има и слики од Борис Џонсон и Емануел Макрон.

Македонскиот премиер Ковачевски, од своја страна, истакна дека за време на срдечната средба, американскиот државен секретар изразил целосна поддршка за дијалогот и пријателството меѓу Северна Македонија и Бугарија и ја споделил неговата искрена желба двете земји да се видат заедно во ЕУ.

„Го делиме ставот дека заедно сме посилни како НАТО сојузници. САД остануваат наш посветен партнер во надминувањето на предизвиците“, рече Ковачевски.

Властите во Вашингтон се уште не соопштуваат ништо за оваа средба. Исто така, не е јасно дали ова е случајна средба (pull-aside) каде што политичарите учествуваат заедно на настан и накратко се среќаваат за да разменат неколку зборови, пишува Локално.