Во Собранието денеска седници ќе одржат собраниските комисии за финансирање и буџет и за европски прашања и Законодавно-правната комисија.

Комисијата за финансирање и буџет ќе ја продолжи 25 седница на чиј дневен ред е Предлогот за изменување и дополнување на Буџетот на Република Северна Македонија за 2021 година, во второ читање.

Членовите на Законодавно-правна комисија и Комисијата за европски прашања ќе расправаат за предлозите на законите за изменување и дополнување на Законот за јавните набавки во областа на одбраната и безбедноста и на Законот за воведување систем за управување со квалитетот и заедничката рамка за процена на работењето и давањето на услуги во државната служба, како и за предлозите на законите за управување со батерии и акумулатори и отпадни батерии и акумулатори, за управување со електрична и електронска опрема и отпадна електрична и електронска опрема, за проширена одговорност на производителот за управување со посебните текови на отпад, за управување со дополнителни текови на отпад.

Дополнително, Законодавно-правната комисија ќе ги разгледува и предлозите на законите за управување со отпадот и за управување со пакување и отпад од пакување, како и за Барањето за давање автентично толкување на член 19 став 1 точка 4 во врска со Член 18 став 1 и член 83 став 1 од Законот за пензиско и инвалидско осигурување, поднесено од градоначалникот на Општина Чашка.