Пратениците денеска продолжија со расправа по Дополнетиот предлог буџет за 2023 година, кој се најде пред нив откако Владата го усвои текстот по прифатените амандмани во собраниската Комисија за финансирање и буџет.

Пратениците од опозицијата и денеска посочија дека буџетот е преобемен и инфлаторен и со него дополнително ќе се зголеми дефицитот и јавниот долг. За власта, буџетот е развоен, насочен кон макроекономско заздравување и е одговор на енергетската криза, со поддршка на граѓаните и стопанството.

Денеска е четврти ден како Собранието расправа за Дополнетиот предлог буџет за 2023 година.

Расправата продолжува во 15:30 часот по редовната едночасовна пауза.

Растот во Предлог-буџетот е проектиран на 2,9 отсто, а инфлацијата на 7,1 отсто. Вкупните приходи се планирани на ниво од 282 милијарди денари и се повисоки за 14,8 проценти во однос на 2022 година, а расходите на ниво од 324,8 милијарди денари или се за 12,6 проценти повисоки во однос на 2022 година. Буџетскиот дефицит е на ниво од 4,6 проценти од планираниот БДП. За капитални расходи се планирани 48,9 милијарди денари или за околу 52,3 отсто повеќе во однос на планот за 2022 година.