Бесплатен паркинг и неограничен влез во Кавадарци за време на „Тиквешки гроздобер”, манифестација што ќе се одржи од 8 до 10 септември. Ова го најави градоначалникот на Општина Кавадарци, Митко Јанчев, на седница на општинскиот Совет.

– Гостите во Кавадарци ќе бидат пречекувани со грозје, со желба убаво да си поминат. За редот при влезот во градот и паркирањето ќе се погрижат вработените во јавното претпријатие за паркинг и волонтери – појасни Јанчев.

За одржување на оваа манифестација предвидени се 10.595.086 денари. Општината ќе издвои 5.300.000 денари, а остатокот се планира да се обезбеди од излагачи, спонзори и донатори на фестивалот.

На „Тиквешки гроздобер” ќе настапат Лепа Брена, Дарко Лазиќ, Халид Бешлиќ и Хурикејн, но и претставници на македонската музичка сцена. Програмата содржи карневалско дефиле, културни настани, изложба на олд тајмери, мото рели, таблијада, огномет.

– За време на фестивалот ќе се посвети внимание на тоа да се опфатат активности за сите генерации, со зачувување и негување на традициите и обичаите типични за Тиквешкиот лозаровинарски регион – се наведува во програмата.

На градскиот плоштад во Кавадарци ќе се презентира тиквешка традиционална храна, виното, ракијата, маџунот.