Силно невреме проследено со обилни врнежи од дожд вечерва го зафати Кавадарци. За половина час наврнале 40 литри/м2.
Центарот за управување со кризи информира дека од невремето поплавени се десетина подруми од куќи, како и средишниот дел од главната ул.7-ми Септември на која во моментот 3 екипи со механизација работат на расчистување.
За испумпување на водата од поплавените подруми на терен се екипи од пожарната од Кавадарци со две пумпи и екипа од Комуналец од Кавадарци со две пумпи.
До повикувачкиот центар во општината, се пристигнати околу дваесетина пријави за поплавени подрумски простории. Екипи на ТППЕ Кавадарци, ЈП Комуналец и “Мој општинар” се на терен. Од силниот дожд вода има навлезено и во зградата на општина Кавадарци.
Градоначалникот на Кавадарци, Митко Јанчев информира дека интензивно се работи на терен по невремето. На терен се повеќе екипи од неколку служби и јавни претпријатија.
-По силното невреме што го зафати Кавадарци, вечерва на терен по поднесените пријави од граѓаните интервенираат служби од Мој Општинар, ТППЕ Кавадарци и ЈП Комуналец. Се известуваат сите граѓани кои имаат било каков проблем да се јават во Кол Центарот на Општина Кавадарци на бројот 13 300, вели Јанчев.
