Советот на Град Скопје на денешната седница ја усвои одлуката за продолжување на соработката помеѓу Владата, ТАВ МАКЕДОНИЈА ДООЕЛ, ТАВ ТЕПЕ АКФЕН Инвестиционо Градежно и Оперативно Акционерско Друштво и Град Скопје. Во врска со обвинувањата дека проектот е тенденциозно закочен, Градоначалничката на Град Скопје, на денешната седница ги отфрли обвинувањата дека овој проект е тенденциозно закочен и се пролонгира неговата реализација.
– За да нема дезинформации и манипулации во јавноста, Градот Скопје нема никаков удел во доцнењето на овој проект. Овој проект не е закочен, туку поради тоа што беа утврдени одредени недоследности во проектот, и тоа утврдени од страна на надзорниот орган, беше вратен до Владата. Владата имаше можност да постапува, а истата со своите дописи информираше дека пред некое време го отстраниле недостатокот. Во она што треба сега да следи за тој објект произлегуваат финансиски импликации по Градот и затоа е неопходна одлука од Советот на Град Скопје. Градоначалникот ниту смее, ниту треба да превземе на себе со свој потпис фискални импликации по Градот Скопје и неговиот Буџет, зошто тоа е буџет на граѓаните – истакна Арсовска.
Градоначалничката Арсовска потенцираше дека Градот не ги кочел активностите за реализацијата на овој проект за изградба на мостот на Љубљанска и дека тоа било во делот на обврските што требаше да ги заврши Владата, а Владата заедно со ТАВ во предвидениот рок ги завршија обврските за отстранување на недоследностите.
– Неопходно е да се превенира сето она кое што може да настане, а многу децидно е кажано во договорот кој што бил потпишан, дека доколку има било какви финансиски импликации, односно некакви разлики во инвестицијата дека дополнителните трошоци ќе следат и ќе треба да бидат обезбедени од нашиот буџет. Затоа, Советот треба да ја поддржи оваа одлука за да се превенира натамошно загрозување на реализацијата на овој значаен проект – рече Арсовска.
По усвојувањето на денешната одлука, наскоро ќе биде потпишан Анексот број 2 кон овој договор, со што ќе се овозможи продолжување на реализацијата на проектот за изградба на мостот на Љубљанска.
