Во текот на мината недела градоначалникот на Општина Аеродром Тимчо Муцунски оствари работна посета на Соединетите Американски Држави во чии рамки тој присуствуваше на Националниот молитвен појадок и на средби со високи претставници на Стејт Департментот, ИРИ и Aмериканскиот Kонгрес.

Како дел од неколкудневната посета на Вашингтон, Муцунски беше поканет и присуствуваше на Националниот молитвен појадок, на кој освен присуството на голем број светски лидери, свое обраќањe имаа Претседателот на САД, Џо Бајден и Кралот на Јордан, Абдула II. Станува збор за настан кој на едно место ги собира меѓународните претставници од различни националности, вери и религии заедно со членовите на Американскиот Конгрес и претставниците на Администрацијата на САД.

Во рамки на средбите кои Муцунски ги оствари со високите претставници на Стејт Департментот, тој ги потенцираше одличните билатерални односи помеѓу нашата држава и САД кои неопходно е во иднина да продолжат да се надградуваат во духот на стратешкото партнерство помеѓу двете земји.

На средбите со конгресменот Бил Паскрел и директорот на Меѓународниот републикански институт Пол Мекарти тој ја истакна потребата од продлабочување на меѓусебната соработка помеѓу двете држави, како во полето на безбедноста, така и во делот на заедничките програми, активности, но и во делот на меѓусебната поддршка за реализација на заеднички проекти и активности.

Овие средби и присуството на важни меѓународни форуми и настани се уште една потврда за потребата од активно учество и проактивна улога во претставувањето и презентирањето на македонските интереси, како и одржувањето на блиски врски со нашите партнери и пријатели од меѓународната заедница. Остварените средби во рамки на посетата на Соединетите Американски Држави ќе резултираат со продлабочување не меѓународната соработка и реализација на голем број локални и национални проекти.