Градот Скопје ги демантира наводите објавени вчера во медиумите во кои се тврди дека кратко по враќањето на 50 во ГТЦ, оваа постојка повторно е затворена.

-Ве информираме дека пренасочувањето на движењето на автобусот со број 50 е привремено заради изведување градежни работи, односно се врши реконструкција на улицата којашто минува под ГТЦ. По завршувањето на оваа реконструкција автобусите повторно ќе застануваат на автобуската постојка во подрумот на ГТЦ. Воедно, сакаме да Ве потсетиме дека за повторното отворање на оваа постојка не беа потрошени финансиски средства на Град Скопје, се наведува во соопштението од Град Скопје.

Сепак, се поставува прашањето зошто Град Скопје најпрво не ја заврши реконструкцијата на улицата, која очигледно била планирана, пред да ја пушти во употреба автобуската постојка во ГТЦ.

Мерката на Петре Шилегов за враќање на „животот во ГТЦ“, траеше само четири недели. Од Градот нема информации колку време ќе помине пред „50“-ката повторно да застанува во ГТЦ.

Не е познато ниту дали, повторното пуштање на автобуската постојка ќе биде проследено со нов музички хепенинг.