Претседателот на раководното тело, Лордот Коу, рече дека од 31 март ниту една жена-трансродова спортистка што поминала низ машки пубертет нема да добие дозвола да се натпреварува на светски натпревари во женски категории. Ќе се формира работна група што ќе спроведе понатамошно истражување за правилата за подобност на трансродовите лица.
„Не велиме не засекогаш“, пренесе за Би Би Си.
Според претходните правила, Федерацијата бараше од трансродовите атлетичарки да го намалат количеството тестостерон во крвта до максимум 5 наномоли на литар и да останат под овој праг континуирано во период од 12 месеци пред натпреварот.Лордот Коу додаде дека одлуката е „водена од сеопфатниот принцип да се заштити женската категорија“.
Тој истакна дека во моментов нема трансродови атлетичари што се натпреваруваат на меѓународно ниво во овој спорт. Светскиот атлетски совет, исто така, гласаше за намалување на количеството тестостерон во крвта дозволена за атлетичарите со разлики во половиот развој (ДСД), како што е Кастер Семења од Јужна Африка.
Од ДСД-атлетичарите ќе се бара да го намалат нивото на тестостерон во крвта на под 2,5 наномоли на литар, од пет, и мора да останат под овој праг две години за да можат да се натпреваруваат на меѓународно ниво во женска категорија на кој било натпревар на атлетика.
Според претходните прописи, ДСД-атлетичарите беа ограничени само на настани од 400 метри до една милја.
„Одлуките се секогаш тешки кога вклучуваат спротивставени потреби и права меѓу различни групи, но ние продолжуваме со ставот дека мора да ја одржуваме правичноста за атлетичарките над сите други размислувања“, рече Лордот Коу.
„Во ова ќе бидеме водени од науката за физичките перформанси и машката предност, која неизбежно ќе се развива во текот на следните години. Кога ќе бидат достапни повеќе докази, ќе ја преиспитаме нашата позиција, но веруваме дека интегритетот на женската категорија во атлетиката е најважен.“
Советот се согласи да формира работна група за 12 месеци за „понатамошно разгледување на прашањето за вклучување на трансродовите лица“. Таа ќе се консултира конкретно со трансродовите атлетичарки, ќе ги прегледува и нарачува истражувањата и ќе дава препораки до Советот.
