Шпанскиот тенисер Рафаел Надал смета дека новиот формат на Дејвис купот ќе има повеќе предности во однос на досегашниот.
Меѓународната тениска федерација веќе ги најави реформите и натпреварувањето од следната сезона ќе добие формат на Светски куп.
Најдобрите светски репрезентации ќе се собраат во ноември во одреден град и ќе се натпреваруваат за трофејот.
Иако се појавија разногласија околу планираните измени, сепак најголем број од тенисерите ги поддржаа реформите.
– Досегашниот формат е посебен на свој начин, но не дозволува секогаш тенисерите да настапат за својата селекција. Добро е што се планира нешто ново, иако треба да е јасно дека секоја промена има и добри и лоши страни, истакна Надал.
Според него новиот формат ќе им овозможи на федерациите да имаат приходи и ќе се отвори можност за привлекување на играчи.
Покрај Надал реформите јавно ги поддржаа и Новак Ѓоковиќ и Марин Чилиќ.