Постојат индиции дека најдобриот тенисер на светот Новак Ѓоковиќ ќе ја претставува Србија на Олимписките игри во Токио.
Новак со видео порака му го честиташе шестиот роденден на јапонскиот тениски талент Којира и по тој повод го најави доаѓањето на Олимписките игри.
“Среќен роденден, пријателе мој, среќен 6 роденден, изгледаш одлично, јас го следам твојот тенис и напредокот. Сè најдобро, се надевам дека ќе те видам на Олимписките игри”, рече Новак.
Новак сè уште не објави дали патува за Токио. По освојувањето на Вимблдон, Новак изјави дека шансите за патување во Токио се 50-50, па сите со нетрпение ја очекуваат неговата одлука.
“Морам да размислам. Мојот план отсекогаш беше да играм на Олимпијада. Сепак, сега моите мисли се малку поделени. Во овој момент, има 50:50 проценти шанси да одам, по информациите што ги дознав во последните неколку дена “, рече Ѓоковиќ на прес-конференција по освојувањето на Вимблдон.
Олимписките игри во Јапонија ќе се одржат без присуство на публика, а се очекува организаторите строго да го ограничат бројот на луѓе што спортистите ќе можат да ги земат со нив.
